लोकमत न्यूज नेटवर्क
मंचर : जुन्या भांडणाचा राग मनात धरून जातिवाचक शिवीगाळ करून कोयत्याने मारहाण केल्याची घटना धामणी (ता. आंबेगाव) येथे घडली. याप्रकरणी १० ते १५ जणांच्या विरोधात मंचर पोलीस ठाण्यात ॲट्रॉसिटीचा गुन्हा दाखल झाला आहे.
मंचर पोलिसांनी दिलेल्या माहितीनुसार धामणी गावातील पंचरासवस्ती येथे मारहाणीचा प्रकार घडला आहे. काळूराम दत्तात्रेय पंचरास यांनी यासंदर्भात मंचर पोलिस ठाण्यात फिर्याद दिली. शुक्रवारी रात्री १० च्या सुमारास काळुराम पंचरास हे फोनवर बोलत होते. त्यावेळी सागर ढोबळे, अजय चव्हाण, पंकज खुडे, इरफान मनियार (सर्व रा.पारगांव शिंगवे) आणि त्यांच्यासोबत इतर १० ते १५ जण मोटारसायकलवरुन आले. त्यातील सागर ढोबळे यांनी काळुराम पंचरास यांना जातीवाचक शिविगाळ केली. तुझ्यामुळेच माझ्या मित्राला मार खावा लागला आहे, असे म्हणून लोखंडी कोयत्याने कपाळावर, डोक्याच्या पाठीमागील बाजूस मारहाण केली. तर इतरांनी शिवीगाळ करुन काळुराम पंचरास यांना लाथाबुक्क्यांनी मारहाण केली. त्यावेळी काळुराम पंचरास यांचे वडील, आई, भाऊ, भावजय, चुलती हे भांडणे सोडविण्यासाठी आले असताना सागर ढोबळे याने सर्वांना शिवीगाळ केली. लाथाबुक्क्यांनी व हाताने मारहाण करून दमदाटी केली. काळुराम दत्तात्रेय पंचरास यांनी या प्रकरणी फिर्याद दिली असून सागर ढोबळे, अजय चव्हाण, पंकज खुडे, इरफान मनियार व इतर १० ते १५ जणांविरोधात गुन्हा दाखल झाला आहे.