--
सांगवी : बारामतीच्या गुन्हेशोधपथकाने बेकायदेशीर पिस्तूल विक्री करणा-या आंतरराज्यीय टोळीला जेरबंद केल्याबरोबरच आता हाती आणखी धागेदोरे लागताच क्षणी पिस्तूल पुरवणाऱ्या म्होरक्यासह बारामती तालुका गुन्हेशोध पथकाने तपासादरम्यान ५ जणांना अटक करत त्यांचाकडून एकूण ५ पिस्तूल व १० राउंड हस्तगत केली. गुन्हेशोध पथकाने विविध गुन्हे दाखल करत आज अखेर ११ आरोपींना अटक केली असून, त्यांच्याकडून १२ पिस्तूलसह २० राऊंड हस्तगत केले आहेत. तर यापूर्वीच मध्य प्रदेशमधून गुन्हेगारी टोळ्यांना पिस्तूल पुरवणाऱ्या म्होरक्यालादेखील गुन्हेशोध पथकाने ताब्यात घेतले आहे.
हनुमंत अशोक गोलार (वय २२, रा. जवळवाडी, खरवंडी कासार, ता. पाथर्डी, जि. अहमदनगर), अल्ताफ सज्जद पठाण (वय ३०, रा. नाईकवाडी मोहल्ला, ता. शेवगाव, जि. अहमदनगर), संतोष प्रभाकर कौटुंबे, (वय ३८, रा. मारवाड गल्ली, ता. शेवगाव, जि. अहमदनगर), जफर अन्सार इनामदार (वय २८, नाईकवाडी मोहल्ला, ता. शेवगाव, जि. अ. नगर), जावेद मुनीर सय्यद (वय २२, आखेगाव रोड, भापकर वस्ती, ता. शेवगाव, जि. अहमदनगर) यांच्या विरोधात भारतीय हत्यार कायदा कलम ३, २५ प्रमाणे गुन्हा दाखल करून अटक करण्यात आली आहे. गुन्हेशोध पथकाने लागोपाठ केलेल्या धडक कारवाईनंतर आता गुन्हेगारी जगतात खळबळ उडू लागली आहे.
मागील आठवड्यात बारामतीत जेवणाच्या बिलावरून हॉटेल चालकाला झालेल्या मारहाणीतून अनोळखी इसमांवर जबरी चोरी, खंडणीचा गुन्हा दाखल करण्यात आला होता. या गुन्ह्याच्या तपासात पिस्तूल पुरवणाऱ्या गुन्हेगारांचे धागेदोरे पोलिसांच्या हाती लागले होते. त्यानुसार परराज्यातून बेकायदेशीररीत्या पिस्तूल आणून महाराष्ट्रातील गुन्हेगारी टोळ्यांना पिस्तूल पुरवणाऱ्या रॅकेटचा सुगावा लागताच बारामतीत पर्दाफाश करून गुन्हे शोधपथकाने आदिनाथ ईश्वर गिरमे (वय २१, रा. पाटस, ता. दौंड, जि. पुणे), विजय रामदास कराड (वय २०, रा. टेंबुर्णी, ता. शिरूर, जि. बीड), अमोल रमेश गर्जे (वय २२, रा. शिरसठवाडी, ता. पाथर्डी, जि. अहमदनगर ) ३ आरोपींना अटक करून त्यांच्याकडून ७ पिस्तूलसह १० जिवंत काडतुसे असा एकूण सव्वादोन लाखांचा मुद्देमाल हस्तगत केला होता.
पुणे ग्रामीणचे पोलीस अधीक्षक डॉ. अभिनव देशमुख, बारामतीचे अतिरिक्त पोलीस अधीक्षक मिलिंद मोहिते, बारामतीचे उपविभागीय पोलीस अधिकारी नारायण शिरगावकर, बारामती तालुका पोलीस ठाण्याचे पोलीस निरीक्षक महेश ढवाण यांच्या मार्दर्शनाखाली बारामती तालुका गुन्हेशोधपथकाचे प्रमुख सहायक पोलीस निरीक्षक योगेश लंगुटे, पोलीस हवालदार दादा ठोंबरे, राहुल पांढरे, विजय वाघमोडे, पोलीस कॉन्स्टेबल नंदू जाधव, विनोद लोखंडे, मंगेश कांबळे, दत्तात्रय मदने यांनी ही कारवाई केली आहे.