लोकमत न्यूज नेटवर्क
पुणे : कोरोनाची दुसरी लाट ओसरत असल्याने बहुतेक सर्व निर्बंध शिथिल करण्यात आले आहेत. परंतु, पुणे जिल्ह्यात प्रामुख्याने ग्रामीण क्षेत्रात अद्याप अपेक्षित प्रमाणात कोरोनाचा धोका कमी झाला नसल्याचे आकडेवारीवरून स्पष्ट होत आहे. पुणे जिल्ह्यात आजही दररोज साडेतीनशेपेक्षा अधिक रुग्ण आढळून येत आहेत. यामध्ये जिल्ह्यात बारामती, जुन्नर तालुक्यात सर्वाधिक हॉटस्पॉट गावे व सक्रिय रुग्ण आहेत. यामुळे गणेशोत्सवाच्या पार्श्वभूमीवर गर्दी केली व नियमांचे उल्लंघन केल्यास तिसऱ्या लाटेला लवकरच निमंत्रण देऊ, असा इशारा तज्ज्ञांकडून देण्यात आला आहे.
पुणे जिल्ह्यात सर्वाधिक कोरोनाबाधित रुग्ण आणि सक्रिय रुग्ण बारामती आणि जुन्नर तालुक्यात आहेत. तर जिल्ह्यात आजही ९१ गावे कोरोनाची हॉटस्पॉट आहेत. जिल्ह्यात जुन्नर, आंबेगाव आणि दौंड या तालुक्यात सर्वाधिक हॉटस्पॉट गावांचा समावेश आहे. तर कोरोनाच्या पहिल्या लाटेत सर्वाधिक हॉटस्पॉट गावे असलेल्या खेड आणि मावळ व भोर आणि वेल्हा आज एक ही गाव हॉटस्पॉटमध्ये नाही.
जिल्ह्यात बारामती तालुक्यात तब्बल ९४० सक्रिय रुग्ण असून ६८० कोरोनाबाधित रुग्ण आहेत. तर जुन्नर तालुक्यात ५२३ कोरोनाबाधित रुग्ण व क्रियाशील रुग्णांची संख्या ७५१ च्या घरात गेली आहे. तर आंबेगाव तालुक्यातील घोडेगावच्या हद्दीत सर्वाधिक ६६ क्रियाशील कोरोना रुग्ण आहेत. घोडेगावपाठोपाठ याच तालुक्यातील मंचर येथे ५७ तर, जुन्नर तालुक्यातील नारायणगाव येथे ५४ क्रियाशील कोरोना रुग्ण असल्याचे दिसून आले आहेत. पुणे जिल्हा परिषदेच्या आरोग्य विभागाच्या वतीने प्रसिद्ध करण्यात आलेल्या अहवालातून हे उघड झाले आहे. जिल्ह्यातील एकूण हॉटस्पॉट गावांपैकी सर्वाधिक २५ गावे ही जुन्नर तालुक्यातील आहेत. जुन्नरपाठोपाठ बारामती तालुक्यातील १५, इंदापूर आणि आंबेगाव तालुक्यातील प्रत्येकी बारा आणि दौंड तालुक्यातील दहा गावांचा समावेश आहे.
----
जिल्ह्यात सर्वाधिक हॉटस्पॉट तालुके व गावांची संख्या
जुन्नर २५, बारामती १५, इंदापूर १२, आंबेगाव १२, दौंड १०, शिरूर ७, हवेली ६, पुरंदर ३, मुळशी १ , एकूण ९१
-----------