कळंबला टँकर पेटविण्याचा प्रयत्न, स्वाभिमानी संघटनेचे झेंडे ताब्यात

दुधाचा टँकर पेटवून देण्याचा प्रयत्न मंचर व नारायणगाव पोलिसांच्या सतर्कतेमुळे हाणून पाडण्यात आला.

मंचर : दुधाचा टँकर पेटवून देण्याचा प्रयत्न मंचर व नारायणगाव पोलिसांच्या सतर्कतेमुळे हाणून पाडण्यात आला. ही घटना कळंब (ता. आंबेगाव) च्या हद्दीत सहाणेमळा येथे दुपारी घडली. पोलिसांनी स्वाभिमानी शेतकरी संघटनेचा बुलडाणा अध्यक्षासह इतर तिघांना अटक केली आहे. तर एक जण फरार झाला आहे. ज्वालाग्राही पदार्थ, स्वाभिमानी संघटनेचे झेंडे व बॅनर तसेच अंबर दिवा व बोलेरो जीप पोलिसांनी जप्त केली. अटक केलेल्यातील दोघांनी यापूर्वी टँकर पेटविल्याचा प्रकार तपासात पुढे आले आहे.नारायणगाव पोलीस ठाण्याचे सहायक पोलीस निरीक्षक अजय गरड पुणे- नाशिक महामार्गावर पेट्रोलिंग करत होते. वाहन वळवण्यासाठी ते सहाणेमळा येथे आले असता. टँकरला बोलेरो आडवी लावून एक जण टँकरवर चढल्याचा दिसला. मंचर येथून टँकर ( एन एल ०१ क्यू ०००१ ) हा मोरडे फूड येथे चॉकलेटचे लिक्विड खाली करून सुरतला निघाला होता. त्यावेळी सहाणेवस्तीजवळ पांढरी रंगाची बोलेरो (एमएच २७ एआर ३४११) ओव्हरटेक करून पुढे आली. टँकरला गाडी आडवी लावून बोलेरेतून पाच जण उतरले. शिव्या देत ही दुधाची गाडी आहे का? अशी विचारणा त्यांनी केली. त्यातील एकाने पाठीमागील कुलूप उघड असे सांगितले असता चालक बजरंग बहादूर अमरनाथ यादव याने त्यास विरोध केला. त्यातील एक जण टँकरवर चढला. पोलीस अधिकारी गोरड यांनी तातडीने तेथे येऊन टँकर पेटवून देण्याचा प्रयत्न हाणून पाडला. त्यावेळी नीलेश नरेंद्रराव कोहळे (रा. सुरुळी, ता. वरूड, जि. अमरावती) याला पकडण्यात आले. मंचर पोलीस ठाण्याचे पोलीस निरीक्षक प्रदीप जाधव यांनी घटनास्थळी येऊन संदीप बाबुराव खडसे (रा.शेंदूर जना घाट), आकाश खुशालराव नागपुरे (रा. गव्हाणकुंड), कैलास वसंतराव फाटे (रा. खामगाव, सर्व ता. रा.खामगाव जि. बुलडाणा) यांना संयुक्त कारवाई करत पकडले. गजानन भंगाळे (रा. देऊळगाव राजा) हा फरार झाला आहे.दरम्यान बोलेरो जीपमधील टँकरला आग लावण्यासाठी आणलेले ज्वालाग्राही पदार्थ तसेच दोन माचीस पेट्या मिळून आल्या. स्वाभिमानी शेतकरी संघटनेचे झेंडे, टोप्या, निळा अंबर दिवा पोलिसांनी जप्त केला आहे. टँकरचालक बजरंग बहादूर अमरनाथ यादव याने दिलेल्या फिर्यादीवरून पोलिसांनी नीलेश नरेंद्रराव कोहळे, संदीप बाबुराव खडसे, आकाश खुशालराव नागपुरे, कैलास वसंतराव फाटे, गजानन भंगाळे यांच्या विरोधात गर्दी जमवून दमदाटी, शिवीगाळ करून टँकर पेटवण्याचा प्रयत्न केल्याचा गुन्हा दाखल केला आहे.त्यातील दोघांनी दुधाचा टँकर पेटवून दिल्याने देनडा पोलीस स्टेशन (ता. वरुड) येथे गुन्हा दाखल झाल्याचे पोलीस तपासात पुढे आले आहे. प्रदीप जाधव व अजय गरड यांनी ही कारवाई केली आहे.कैलास वसंतराव फाटे हे स्वाभिमानी संघटनेचा बुलडाणा जिल्हाध्यक्ष तर इतर कार्यकर्ते असल्याचे पोलिसांनी सांगितले. त्यातील दोघांनी दुधाचा टँकर पेटवून दिल्याने देनडा पोलीस स्टेशन (ता. वरुड) येथे गुन्हा दाखल झाल्याचे पोलीस तपासात पुढे आले आहे. आंदोलनाला विदर्भात प्रतिसाद मिळत नसल्याने पश्चिम महाराष्ट्रात आंदोलन भडकाविण्यासाठी असे अनेक कार्यकर्ते जिल्ह्यात आल्याची माहिती पोलीस सूत्रांनी दिली.