लोकमत न्यूज नेटवर्क
पुणे : साफसफाई करत असताना दगड फेकून मारल्याचा जाब विचारला म्हणून तिघांनी एका तरुणाच्या खुनाचा प्रयत्न केला़ तसेच त्याच्या मावसभावाच्या डोक्यात दगड घालून जखमी केले.
याप्रकरणी भारती विद्यापीठ पोलिसांनी खुनाचा प्रयत्न केल्याचा गुन्हा दाखल करून तिघांना अटक केली आहे.
सुमित राजू अहिवळे (वय २३), अक्षय किसन अंदारे (वय २५) आणि नीलेश प्रल्हाद शिंदे (वय २३, सर्व रा. वाघजाईनगर, आंबेगाव खुर्द) अशी अटक केलेल्यांची नावे आहेत.
याप्रकरणी केतन नरळे (वय २१, रा. वाघजाईनगर, आंबेगाव खुर्द) यांनी भारती विद्यापीठ पोलिसांकडे फिर्याद दिली आहे. केतन नरळे हे वंदना दूध डेअरीच्या समोर २३ मे रोजी सायंकाळी साफसफाई करीत होते. या वेळी अक्षय अंदारे याने फिर्यादीच्या दिशेने दगड फेकून मारला. त्याचा जाब विचारण्यासाठी केतन गेला असताना आरोपींनी त्याला जीवे मारण्याच्या उद्देशाने त्याचा गळा दाबला. केतन याचा मावसभाऊ शंकर शिंदे यांच्या डोक्यात दगड फेकून जखमी केले. पोलीस उपनिरीक्षक रवींद्र गोडसे अधिक तपास करीत आहेत.