लोकमत न्यूज नेटवर्क
शेलपिंपळगाव : खुनाच्या गुन्ह्यात अटक असलेल्या आरोपीची कोरोना काळात तात्पुरत्या जामिनावर सुटका करण्यात आली. तो आळंदी घाटावर फिरत असताना २३ फेब्रुवारी रोजी रात्री त्याच्यासोबत जबरी चोरीचा प्रयत्न झाला. त्यावेळी झालेल्या भांडणात तिघांनी मिळून त्याचा खून केला. विशेष म्हणजे घटनास्थळी कोणताही पुरावा नसताना आळंदी पोलिसांनी मोठ्या शिताफीने या प्रकरणाचा तपास लावून तीनपैकी दोन आरोपींना जेरबंद केले. या कामगिरीबद्दल पोलीस आयुक्त कृष्ण प्रकाश यांच्या हस्ते आळंदी पोलीस पथकाचा विशेष प्रमाणपत्र देऊन गौरव करण्यात आला.
पोलीस आयुक्त कृष्ण प्रकाश यांनी दिलेल्या माहितीनुसार, २३ फेब्रुवारी रोजी इंद्रायणी नदीच्या घाटावर एका व्यक्तीचा मृतदेह आढळून आला होता. या व्यक्तीच्या डोक्‍यात जड वस्तूने मारले होते. तसेच चेहरा विद्रुप केला होता. त्यानुसार आळंदी पोलिसांनी मृतदेह ताब्यात घेत खुनाचा गुन्हा दाखल केला. सुरुवातीला घटनेबाबत काहीही पुरावा आढळला नाही. मृताच्या मोबाइल फोनवरून त्याची ओळख पटवण्यात पोलिसांना यश आले. महादेव शाम खंदारे (वय ३०) असे खून झालेल्या व्यक्तीचे नाव आहे. मात्र, आरोपींबाबत सुरुवातीला कोणतीही माहिती मिळाली नाही.
यापार्श्वभूमीवर आळंदी पोलिसांनी दोन पथके तयार करून गुन्ह्याचा तपास सुरू केला. त्यात संशयित आरोपी निष्पन्न करून संतोष ऊर्फ कांच्या केरबा कांबळे (वय १९, रा. काळेवाडी देहूफाटा), केतन प्रकाश शिंदे (वय १८, रा. आळंदी) यांना ताब्यात घेऊन चौकशी केली असता आरोपींनी त्यांच्या देविदास ऊर्फ देव्या बबन चौरे (रा. हडपसर) नावाच्या फरार असलेल्या साथीदारासोबत मिळून हा गुन्हा केल्याचे कबूल केले. ही कामगिरी पोलीस आयुक्त कृष्ण प्रकाश, अपर आयुक्त रामनाथ पोकळे, उपायुक्त मंचक इप्पर, सहायक आयुक्त राम जाधव यांच्या मार्गदर्शनाखाली वरिष्ठ पोलीस निरीक्षक ज्ञानेश्वर साबळे, उपनिरीक्षक सुरेखा सागर, बापू जोंधळे, पोलीस कर्मचारी राजाराम लोणकर, बाळासाहेब खेडकर, नितीन साळुंखे, बाजीराव सानप, गजानन आडे, कैलास गर्जे, त्रिमूर्ती भोंडवे, दत्तात्रय टोके, संदीप रसाळ, रामदास मुकणे, मच्छिंद्र शेंडे यांच्या पथकाने केली आहे.
फोटो ओळ : आळंदी पोलीस पथकाचा गौरव करताना पोलीस आयुक्त कृष्ण प्रकाश.