लोकमत न्यूज नेटवर्क
पुणे : मेव्हण्याच्या मित्राची मारहाण करणाऱ्यांपासून सोडवून केल्याच्या रागातून तरुणावर तलवारांनी वार करून दगडाने मारहाण करून जबर जखमी करण्याचा प्रकार खडकीत घडला. याप्रकरणी खडकी पोलिसांनी ११ जणांवर खुनाचा प्रयत्न केल्याचा गुन्हा दाखल केला आहे.
बंटी ऊर्फ कपिल भोसले (रा. राजीव गांधीनगर, खडकी), मोन्या गोपनारायण, शरद तायडे, विक्रांत देवकुळे (रा. औंध रोड), सौरभ मोरे, यलिंगा ऊर्फ येल्या (रा. बोपोडी), हर्ष चांदणे (रा. राजीव गांधीनगर, खडकी), अमोल भोसले (रा. सांगवी), डोके आणि सुशील अशी गुन्हा दाखल झालेल्यांची नावे आहेत.
याप्रकरणी दत्ता दिलीप सोळुंके (वय २७, रा. राजीव गांधीनगर, खडकी) यांनी फिर्याद दिली आहे. सोळुंके हे कुटुंबासह २९ मार्च रोजी रात्री साडेआठ वाजता रिक्षाने जात होते. यावेळी एल्फिस्टन रोडवर त्यांच्या मेव्हण्याचा मित्र अनुज गुप्ता याला मारहाण चालू होती. त्यांनी रिक्षा थांबूवन विचारपूस केली. अनुज याला मारहाणीपासून सोडविले. त्यानंतर ते रिक्षाने घरी राजीव गांधीनगर येथील रेल्वे मार्गाजवळ आले. भांडणे सोडविल्याच्या रागातून बंटी भोसले याने इतरांना जमवून सोळुंके यांना घरासमोर अडविले. त्यांच्यावर तलवारीने वार केला. तसेच दगडाने मारहाण करून गंभीर जखमी केले. खडकी पोलिसांनी ११ जणांवर खुनाचा प्रयत्न केल्याचा गुन्हा दाखल केला आहे.