लोकमत न्यूज नेटवर्क
पुणे : एटीएममधून पैसे काढून देण्यासाठी मदत करण्याचा बहाणा करुन एटीएम कार्डची आदलाबदल करुन खात्यातून पैसे काढून फसवणूक करणाऱ्यास सायबर पोलिसांनी अटक केली.
अनुप शिवनारायण पाझरे (वय ३३, रा. ढमाळवाडी, फुरसुंगी, मूळ नागपूर) असे त्याचे नाव आहे. त्याच्याकडून वेगवेगळ्या बँकांची २७ एटीएम कार्ड, १ मोबाईल, ५० हजार रुपये रोख, दोन अंगठ्या, एक चैन असा ऐवज जप्त केला आहे. पाझरे याच्याविरुद्ध तेलगंणा राज्यातील अदिलाबाद तसेच नागपूरमधील हिंगणघाट, सावनेर, उमरखेड, खापरखेडा, कामठी पोलीस ठाण्यात ७ गुन्हे दाखल आहे. त्यापैकी ६ गुन्ह्यात तो फरार होता. कोंढवा पोलीस ठाण्यातही अशा प्रकारे एटीएम कार्ड बदल करुन फसवणूक केल्याचा गुन्हा दाखल आहे.
कारपेंटरचे काम करणार्या व्यक्तीला २० जानेवारी रोजी एटीएममधून पैसे काढून देण्यासाठी मदत करण्याचा बहाणा करुन त्याच्या एटीएम पीनची माहिती घेऊन त्याच्या कार्डचा वापर करुन ७५ हजार ७६० रुपये काढून घेऊन फसवणूक केली होती. सायबर पोलीस ठाण्याचे पोलीस शिपाई जाधव, अश्विन कुमकर, नवनाथ जाधव, अत्तार, गावडे यांनी तांत्रिक विश्लेषण, सीसीटीव्ही फुटेज याद्वारे आरोपीचा माग काढला. अनुप पाझरे याला फुरसुंगी येथून ताब्यात घेतले. चौकशीत त्याने गुन्ह्याची कबुली दिली.
पोलीस उपायुक्त भाग्यश्री नवटके, सहायक आयुक्त शिवाजी पवार, वरिष्ठ पोलीस निरीक्षक राजकुमार वाघचवरे यांच्या मार्गदर्शनाखाली पोलीस निरीक्षक कुमार घाडगे, उपनिरीक्षक अजुर्न बेंदगुडे व त्यांच्या ही कामगिरी पथकाने केली.