पुणे : अल्पवयीन असताना तरुणीबरोबर शारीरिक संबंध ठेवून त्याचे चित्रीकरण करून ते संबंधित तरुणीच्या वस्तीतील मुलांना पाठवून बदनामी करणाऱ्या तरुणाला येरवडा पोलिसांनी अटक केली आहे. नीलेश सुभाष शेंडगे (वय २५, रा. लोहियानगर) असे अटक केलेल्याचे नाव आहे.
याप्रकरणी एका १९ वर्षांच्या तरुणीने येरवडा पोलिसांकडे फिर्याद दिली आहे. ही घटना ऑक्टोबर २०१८ ते ३० ऑगस्ट २०२१ दरम्यान घडली. येरवडा पोलिसांनी बलात्कार तसेच पोस्को कायद्यान्वये गुन्हा दाखल केला आहे.
ही तरुणी अल्पवयीन असताना नीलेश शेंडगेने तिच्याबरोबर प्रेमसंबंध प्रस्थापित केले. तिच्या इच्छेविरुद्ध मित्रांच्या खोलीवर व इतर ठिकाणी नेऊन तिच्याशी शारीरिक संबंध निर्माण केले. त्याचे चित्रीकरण केले. या संबंधातून ती गर्भवती राहिल्यावर त्याने बहिणीच्या मदतीने तिचा गर्भपात करविला. तिने लग्नाविषयी विचारल्यावर शेंडगेने तिच्याबरोबर लग्न करण्यास नकार दिला. त्यानंतर त्याने फिर्यादी राहात असलेल्या वस्तीतील मुलांना तिच्याशी ठेवलेल्या संबंधांचे चित्रीकरण पाठवून तिची बदनामी केली. येरवडा पोलिसांनी नीलेश शेंडगे याला अटक केली असून पोलीस उपनिरीक्षक डोंगरे अधिक तपास करीत आहेत.