पुणे: कोयत्याच्या धाकाने पेट्रोल पंपावरील कर्मचाऱ्याकडील १६ हजार रुपये लुटल्याप्रकरणी विमानतळ पोलिसांनी आणखी एकाला अटक केली. न्यायालयाने त्याला १९ आॅगस्टपर्यंत पोलीस कोठडी सुनावली.
अनिकेत ऊर्फ दत्तात्रय जाधव (वय १९) असे अटक आरोपीचे नाव आहे. याप्रकरणी यापूर्वी एकाला अटक केली असून, सध्या तो पोलीस कोठडीत आहे. याबाबत २१ वर्षीय पेट्रोलपंप कर्मचाऱ्याने फिर्याद दिली आहे. दि. १२ आॅगस्ट रोजी लोहगाव परिसरातील धानोरी रोड येथे ही घटना घडली.
फिर्यादी हे पेट्रोल पंपावर पेट्रोल भरण्याचे काम करत करत असताना दुचाकीवरून आलेल्या दोघांनी चारशे रुपयांचे पेट्रोल भरले. फिर्यादी यांनी पैशाची मागणी केली असता, त्यातील एकाने आॅनलाईन पेमेंट आहे का? अशी विचारणा केली. त्यातील दुसऱ्या आरोपीने कोयत्याचा धाक दाखवून पैशांची मागणी केली. त्यानंतर फिर्यादींच्या खिशामध्ये हात घालून १६ हजार रुपये काढून घेतले, असे फिर्यादीत नमूद आहे. या प्रकरणी जाधव याला न्यायालयात हजर केले असता, गुन्ह्यातील रक्कम हस्तगत करण्यासाठी तसेच आरोपींनी विविध पोलीस स्टेशनमध्ये गुन्हे दाखल असल्याने त्याबाबत त्यांच्याकडे तपास करण्यासाठी, आरोपी हत्यार घेऊन नेमके कोणत्या कारणासाठी त्या ठिकाणी आले होते? त्यांनी अशा प्रकारे आणखी गुन्हे केले आहेत का?, त्यांचा आणखी कोणी साथीदार आहे का? याचा तपास करण्यासाठी त्यांना पोलीस कोठडी देण्याची मागणी सरकारी वकिलांनी केली.
--------------------------------------------------------------