----
रांजणगाव सांडस : मांडवगण फराटा (ता. शिरूर) कोरोनाच्या दुसऱ्या लाटेत अनेकांचे रुग्णवाहिकाअभावी हाल झाले. याबाबतचे वृत्त ‘लोकमत’ने वारंवार दिले त्याची दखल घेत जिल्हा परिषद सदस्या सुजाता पवार यांनी पाठपुरावा केला आणि अखेर आज गावात रुग्णवाहिका उभी राहिली. १४ व्या वित्त आयोगातून देण्यात आलेल्या अत्याधुनिक रुग्णवाहिकेचे लोकार्पण सुजाता पवार यांच्या हस्ते झाले.
शिरूर तालुक्यातील पूर्व भागात कोरोनाच्या दुसऱ्या लाटेत मोठ्या प्रमाणावर संसर्ग झाल्याने अनेक कुटुंबं बाधित झाली. यामध्ये अनेकांना वेळेवर रुग्णवाहिका उपलब्ध न झाल्याने प्राणास मुकावे लागले. त्या प्रत्येक घटनेचे वार्तांकन ‘लोकमत’ने केले.
रुग्णवाहिका वेळेत न मिळाल्याने रुग्णांचे होणारे हाल लक्षात घेत जिल्हा परिषद सदस्या सुजाता पवार यांनी पुणे जिल्हा परिषदेकडे याबाबत मागणी करत सातत्याने पाठपुरावा केला. अखेर त्यांच्या प्रयत्नांना यश आले आणि जिल्हा परिषदेच्या १४ व्या वित्त आयोग निधीतून रुग्णवाहिका मंजूर झाली होती.
मंगळवार (दि. ६) रोजी या नव्या रुग्णवाहिकेचे लोकार्पण ग्रामस्थांच्या उपस्थितीत करण्यात आले. मांडवगण फराटा प्राथमिक आरोग्य केंद्राला अत्याधुनिक रुग्णवाहिका उपलब्ध झाल्याने वडगाव रासाई, शिरसगाव काटा, इनामगाव, पिंपळसुटी, गणेगाव दुमाला, बाभूळसर बुद्रूक, सादलगाव, तांदळी, कुरुळी आदी गावांना रुग्ण वेळेत दवाखान्यात पोहोचण्यासाठी मदत होणार असल्याचे जिल्हा परिषद सदस्या सुजाता पवार यांनी सांगितले.
या वेळी गटविकास अधिकारी विजयसिंह नलावडे, सभापती मोनिका हरगुडे, डॉ. मंजूषा सातपुते यांसह परिसरातील सरपंच व पदाधिकारी उपस्थित होते.