लोकमत न्यूज नेटवर्क
पुणे : सराईत गुन्हेगारांची कंबर मोडीत काढताना पुण्यातील गुन्हेगारीला पोलीस आयुक्त अमिताभ गुप्ता यांच्या मार्गदर्शनाखाली आणखी एक दणका दिला आहे. वारजे माळवाडी पोलीस ठाण्याच्या हद्दीतील गौरव पासलकर टोळीवर आता संघटित गुन्हेगारी कायद्यान्वये (मोक्का) कारवाई केली आहे.
गौरव सुरेश पासलकर, मंगेश विजय जडीतकर, पल्लू कमलेश चौधरी आणि राजू लक्ष्मण गेहलोत अशी मोक्का कारवाई केलेल्या गुन्हेगारांची नावे आहेत.
वारजे माळवाडी येथील गोकुळनगरमधील वसुधंरा सोसायटी येथे १३ मार्च रोजी रात्री ११ वाजण्याच्या सुमारास गौरव पासलकर व त्याच्या तीन साथीदारांनी विकास विष्णू जानावळे (वय २६, रा. गोकुळनगर, वारजे माळवाडी) यांना जबरदस्तीने कारमध्ये बसवून अपहरण केले होते. तसेच त्याच्या खिशातून रोख रक्कम जबरदस्तीने काढून घेतली. कोयत्याने मारहाण केली होती.
याप्रकरणात गौरव पासलकर आणि मंगेश जडीतकर यांना अटक करण्यात आली होती. तपासामध्ये पासलकर हा टोळीचा म्होरक्या असून त्याच्या अधिपत्याखाली तो इतर साथीदारांना घेऊन गुन्हे करत असल्याचे निष्पन्न झाले आहे. पासलकर याच्या टोळीवर दरोडा, जबरी चोरी, दंगा, बेकायदेशीर घरात घुसणे, शस्त्राचा धाक दाखवून धमक्या देणे, नागरिकांच्या मालमत्तेचे नुकसान करणे असे गुन्हे दाखल आहेत. दरम्यान, पोलीस उपायुक्त पौर्णिमा गायकवाड यांच्या मार्गदर्शनाखाली वरिष्ठ पोलीस निरीक्षक शंकर खटके यांनी अपर पोलीस आयुक्त डॉ. संजय शिंदे यांच्याकडे प्रस्ताव सादर केला होता. डॉ. शिंदे यांनी प्रस्तावाला मंजुरी दिली.
.........
आयुक्तांच्या मार्गदर्शनाखाली २३ वी कारवाई
पोलीस आयुक्त अमिताभ गुप्ता यांनी आयुक्तपदाचा कार्यभार स्वीकारल्यानंतर गुन्हेगारी नियंत्रणावर बारकाईने लक्ष देऊन गंभीर गुन्ह्याच्या ठिकाणी स्वतः भेट देऊन कडक कारवाई करण्याबाबत व गुन्हेगारीचे समूळ उच्चाटन करण्यासंबधी सूचना केल्या होत्या. त्यांच्या मार्गदर्शनाखाली केलेली ही २३ वी कारवाई आहे. या वर्षातील ही मोक्काची १७ वी कारवाई आहे.