लोकमत न्यूज नेटवर्क
पुणे : माधव हनुमंत वाघाटे याच्या खुनानंतर त्याच्या पार्थिवाची शेकडोंच्या उपस्थितीत अंत्ययात्रा काढल्याचे व्हिडिओ व्हायरल झाले. त्यामुळे पोलिसांना आव्हान दिल्यावर काय होते, याचा प्रत्यय या अंत्ययात्रेत सहभागी झालेल्यांना आला. पुणे पोलिसांच्या १५ पथकांनी रात्रीचा दिवस एक करुन तब्बल ९६ जणांना शोधून अटक केली. ४० हून अधिक गाड्या जप्त केल्या. मोठा पोलीस फौजफाटा घेऊन या सर्वांची ससून रुग्णालय, गंगाधाम व धनकवडीतील सेंटरवर रॅपिट टेस्ट केली. सुदैवाने त्यांची टेस्ट निगेटिव्ह आली. त्यानंतर या सर्वांना न्यायालयात नेले. न्यायालयाने त्यांची न्यायालयीन कोठडीत रवानगी केली. त्यामुळे येरवडा कारागृहात दाखल करण्यापूर्वी त्यांची पुन्हा कोरोना चाचणी केली. त्याचा रिपोर्ट उद्या येणार आहे. कोरोना संसर्ग सुरु झाल्यानंतर एकाच गुन्ह्यात इतक्या मोठ्या प्रमाणावर आरोपींना अटक करुन त्या सर्वांची वैद्यकीय तपासणी करुन त्यांना न्यायालयापुढे हजर करण्याची ही पहिलीच वेळ आहे.
कोरोनाचा संसर्ग आणि त्याबाबत घ्यावयाची दक्षता यामुळे सध्या आरोपींना अटक करुन त्यांच्यावर कारवाई करण्यासाठी पोलिसांना मोठे परिश्रम करावे लागत असतात.
माधव वाघाटे याचा बिबवेवाडी पोलीस चौकीच्या समोर १० जणांनी खून केला. त्यानंतर शनिवारी दुपारी एक वाजण्याच्या सुमारास सुमारे २० जणांनी त्याची अंत्ययात्रा काढली होती. त्याचे व्हिडिओ व्हायरल झाल्यावर पुणे पोलिसांवर चौफर टीका होऊ लागली. आम्ही बाहेर पडलो तर लगेच ५०० रुपये दंड आकारतात, मग अशा वेळी पोलीस कोठे गेले होते, अशी विचारणा सोशल मीडियावर होऊ लागली. याची दखल घेऊन पोलीस आयुक्त अमिताभ गुप्ता यांनी त्यांच्यावर तातडीने कारवाई करण्याचे आदेश दिले. त्यामुळे गुन्हे शाखेतील १५ पथके, परिमंडळ २, सहकारनगर, भारती विद्यापीठ व इतर पोलीस ठाण्यातील पोलिसांची मदत घेण्यात आली. त्यासाठी १५ पोलीस पथकांची स्थापना केली. या पथकांनी धनकवडी ते कात्रज स्मशानभूमी या संपूर्ण मार्गावरील सीसीटीव्हींची तपासणी केली. त्यातून दुचाकी, कार व रिक्षा यांचे नंबर घेऊन तसेच गाड्यांवरील आरोपींचे पडताळणी करुन त्यांना ताब्यात घेण्याचा सपाटा लावला़ रविवारी संपूर्ण दिवसभर ही कारवाई करण्यात आली़ सायंकाळपर्यंत ८० जणांना अटक केली़ इतक्या मोठ्या प्रमाणावर अटक केलेल्या लोकांना कोरोनाचे सर्व नियम पाळून त्यांची वैद्यकीय तपासणी, रॅपिड टेस्ट करण्यासाठी वेगवेगळ्या ठिकाणी घेऊन जाण्याची आवश्यकता होती़ त्यासाठी राखीव पोलीस फौजफाटा गाड्या मागविल्या. जवळच्या पोलीस ठाण्यातील पोलिसांची मदत घेतली. शहरातील वेगवेगळ्या चाचणी केंद्रावर या आरोपींना बंदोबस्तात नेले. रात्रभर या सर्व आरोपींची टेस्ट करण्यात आली. त्यानंतर मोठ्या बंदोबस्तात त्यांना दुपारी न्यायालयात हजर केले. न्यायालयाने त्यांची न्यायालयीन कोठडी मंजूर केल्यानंतर त्यांना पुन्हा कोरोनाची चाचणी करण्यात येऊन कारागृहात रवानी केली आहे. गुन्हे शाखेतील १५ पथके, परिमंडळ २ आणि स्थानिक पोलीस ठाण्यातील कर्मचाऱ्यांनी रात्रभर जागून ही कारवाई पूर्ण केली. सहकारनगर पोलीस ठाण्याचे पोलीस उपनिरीक्षक बी. एस. खेंगरे अधिक तपास करीत आहेत.