थेरगावात टवाळखोरांचा राडा

दुकानदारास मारहाण करीत पाच ते सात टवाळखोरांनी परिसरातील दोन रिक्षांची तोडफोड केल्याची घटना थेरगाव येथे शुक्रवारी सायंकाळी साडेसातच्या सुमारास घडली.

वाकड : दुकानदारास मारहाण करीत पाच ते सात टवाळखोरांनी परिसरातील दोन रिक्षांची तोडफोड केल्याची घटना थेरगाव येथे शुक्रवारी सायंकाळी साडेसातच्या सुमारास घडली. टवाळखोरांच्या मारहाणीत फैयाज इमाम शेख (वय १९, रा. नंदिनी कॉलनी, तापकीर चौक, काळेवाडी) व प्रेम कुमार चोरडिया (वय ३०, रा. वाकड ) हे दोघे जखमी झाले.पोलिसांनी दिलेल्या माहितीनुसार, डांगे चौकात हिंजवडीकडे जाणाऱ्या रस्त्यावरील एका कुलूप विक्री-दुरुस्तीच्या दुकानात हे टवाळखोर हातात लाकडी दंडुके घेऊन गेले. तेथे त्यांनी किरकोळ किल्ली खेरदी करण्याच्या कारणावरून हुज्जत घातली आणि दुकानात काम करणाऱ्या प्रेम कुमारला मारहाण करायला सुरुवात केली. या वेळी मदतीसाठी गेलेल्या शेजारील कपडे विक्री करणारा दुकानदार फैयाज शेख यालाही या टोळक्यांनी मारहाण केली. या मारहाणीत दोघे जखमी झाले असून, त्यांच्यावर खासगी रुग्णालयात उपचार सुरू आहेत. त्यानंतर टवाळखोरांनी तेथे उभ्या असलेल्या दोन रिक्षांच्या काचाही फोडल्या. घटनेची माहिती मिळताच वाकड पोलीस ठाण्याचे पोलीस निरीक्षक एन. जे. शेख पोलीस कर्मचाऱ्यासह दाखल झाले. तोपर्यंत टवाळखोर पसार झाले होते. शेख यांनी परिसराची पाहणी करून टवाळखोर ज्या दिशेने पोलिसांचे पथकही तपासासाठी रवाना केले. यामुळे काही वेळ तणावाची परिस्थिती निर्माण झाली होती. (वार्ताहर)