शस्त्राच्या धाकाने लुबाडणूक

मुंबई-पुणे महामार्गावर देहूरोड येथील स्वागत कमानीजवळ नादुरुस्त झाल्याने दुरुस्तीसाठी उभ्या असलेल्या मालमोटार चालकाला

लोकमत न्यूज नेटवर्कदेहूरोड : मुंबई-पुणे महामार्गावर देहूरोड येथील स्वागत कमानीजवळ नादुरुस्त झाल्याने दुरुस्तीसाठी उभ्या असलेल्या मालमोटार चालकाला दोन दुचाकीवरून आलेल्या सहा इसमांनी तलवार व कोयत्याचा धाक दाखवून मारहाण करीत रोकड व मोबाईल असा बारा हजार सातशे रुपयांचा ऐवज जबरदस्तीने पळवून नेला. मंगळवारी मध्यरात्री साडेबाराच्या सुमारास हा प्र्रकार घडला. एका अल्पवयीन आरोपीसह चौघांना देहूरोड पोलिसांनी ताब्यात घेतले आहे.राजू दशरथ काटे (वय ४५, रा. नांदगाव, शिवाजी चौक, ता. तुळजापूर, जि. उस्मानाबाद) असे जखमी चालकाचे नाव आहे. येथील संत तुकाराममहाराज स्वागत कमानीजवळ नादुरुस्त मालमोटार (एमएच २५ यू १११०) रस्त्याच्या कडेला उभी केली होती. दुरुस्तीसाठी मेकॅनिकच्या प्रतीक्षेत थांबलेल्या चालकाला दोन दुचाकीवरून आलेल्या सहा अज्ञातांनी तलवार आणि कोयत्याचा धाक दाखवला. चालकाच्या हातावर वार करून चालक व त्याचा सहकारी अशा दोघांकडील मोबाईल व ७५०० रुपये घेऊन ते देहूगावच्या दिशेने पसार झाले. माहिती मिळताच पोलिसांनी तपासाची चक्रे वेगाने फिरवली.