पिंपरी : काही दिवसांपूर्वीच नेहरुनगरातील २२ जुगारींंवर कारवाई झाली असताना, या कारवाईचा धाक न बाळगता जुगार खेळणाऱ्यांवर भोसरी पोलिसांनी शनिवारी पुन्हा छापा टाकला. या कारवाईत पाच हजारांचा ऐवज जप्त करण्यात आला असून, पाच जणांवर कारवाई करण्यात आली.पिंपरी-चिंचवड शहरात काही ठिकाणी लपून-छपून, तर काही ठिकाणी खुलेआम जुगारअड्डे सुरू आहेत. गेल्या आठवड्यातच पिंपरी पोलिसांनी नेहरुनगरातील पत्र्याच्या शेडमध्ये सुरु असणाऱ्या जुगार अड्ड्यावर छापा टाकूून, पावणेदोन लाखांचा ऐवज व जुगाराचे साहित्य जप्त केले होते. यामध्ये तब्बल २२ जणांवर कारवाई झाली. या कारवाईनंतर अवैध धंद्येवाल्यांचे धाबे दणाणले होते. मात्र, पोलिसांच्या कारवाईची भीती न बाळगता दापोडी रेल्वे स्टेशनजवळ मोकळ्या जागेत जुगार खेळला जात असल्याची गुप्त माहिती भोसरी पोलिसांना मिळाली. त्यानुसार यावर एपीआय मोरे व त्यांच्या पथकातील कर्मचाऱ्यांनी शनिवारी दुपारी साडेतीनच्या सुमारास छापा टाकला. जुगार खेळताना कृष्णा मोरे, फिरोज शेख, रुपकुमार तिवारी, राहुल जगताप, सिकंदर शेख यांना मुद्देमालासह पकडले. (प्रतिनिधी)
जुगार अड्ड्यावर भोसरीमध्ये छापा
By admin | Updated: November 23, 2015 00:40 IST