कोतवालांना चार महिने पगारच नाही

तहसीलच्या कार्यक्षेत्रातील महसूल विभागात काम करणाऱ्या कोतवालांना चार महिन्यांपासून पगारच मिळालेला नाही.

लोणी काळभोर : तहसीलच्या कार्यक्षेत्रातील महसूल विभागात काम करणाऱ्या कोतवालांना चार महिन्यांपासून पगारच मिळालेला नाही. त्यामुळे शासकीय राजशिष्टाचारात चोख कामगिरी बजावणाऱ्या कोतवालांना नोटाबंदीच्या काळात पगाराची रक्कम न मिळाल्याने मात्र बुरे दिन आले आहेत. गावकामगार तलाठ्यांच्या गैरहजेरीत सर्व शेतकरी खातेदारांची कामे कोतवाल पार पडत असल्याने ग्रामीण भागात त्यांना मिनी तलाठी म्हणून ओळखले जाते. प्रशासनाकडून मासिक वेतन न मिळाल्यास मिनी तलाठ्यांना आंदोलन करावे लागेल, असे पुणे जिल्हा कोतवाल संघटनेने म्हटले आहे.पुणे जिल्ह्यात गौणखनिज वसुलीचे काम असो अथवा महसूल विभागातील स्थळपाहणी, आपत्कालीन परिस्थिती, पंचनामा, संगणकीकृत सात-बारा यामध्ये कोतवाल सातत्याने तलाठ्यांना मदत करीत असतात. अगदी मंत्र्यांपासून वरिष्ठ अधिकाऱ्यांच्या प्रोटोकॉलची जबाबदारीही कोतवाल इमानेइतबारे पार पाडतात. मात्र, पुणे जिल्ह्यात कार्यरत असलेल्या ४३७ कोतवालांना पगारच न मिळाल्याने त्यांच्यावर उपासमारीची वेळ आली आहे. कोतवालांना त्वरित वेतन न दिल्यास प्रशासनच्या विरोधात आंदोलन करणार असल्याची माहिती पुणे जिल्हा कोतवाल संघटनेचे अध्यक्ष नामदेव शिंदे यांनी दिली. (वार्ताहर)