- मयूर पठाडे'संपलं तुमचं आयुष्य. तुमच्या आयुष्यातली शेवटची पाच वर्षं आता उरली आहेत. एवढ्या काळात जे करायचं ते करून घ्या', असं जर तुम्हाला कोणी सांगितलं तर?तुम्ही नक्कीच त्याला म्हणाल, भाऊ, हा काही हिंदी चित्रपट नाही कि त्याची स्टोरी. जे काही बोलायचं ते नीट आणि स्पष्ट बोल..तुम्हाला आश्चर्य वाटेल, पण ही काही आता 'गंमत' राहिलेली नाही. तुम्ही खरंच अजून किती वर्षं जगाल, तुमच्या आयुष्याची नौका कधी पैलतीरी लागेल, हे बऱ्यापैकी ठामठोकपणे सांगू शकेल असं तंत्रज्ञान शास्त्रज्ञांनी विकसित केलं आहे. शास्त्रज्ञांनी आर्टिफिशिअल इन्टेलिजन्सच्या साहाय्यानं ही अशक्यातली गोष्ट जवळपास शक्य केली आहे.त्यासाठी कंम्प्युटर टेक्नॉलॉजीचीही मदत घेतली आहे. तुमच्या फोटो इमेजेस पाहून हा कॉम्प्युटर सांगू शकेल,तुमचं आयुष्य पाच वर्षांपेक्षा जास्त आहे की कमी! या कंम्प्युटर भविष्यवाणीची अचूकता ६९ टक्के आहे. तरीदेखील हे संशोधन खूपच उपयुक्त मानलं जात असून त्यामुळे अशा रुग्णांच्या 'टेलरमेड' उपचारासाठी मोठी मदत होईल.आॅस्ट्रेलियाच्या अॅडलेड युनिव्हर्सिटीतील शास्त्रज्ञांच्या टीमनं ही करामत केली असून त्याचं हे संशोधन 'सायंटिफिक रिपोर्ट्स' या विज्ञानविषयक प्रसिद्ध जर्नलमध्ये नुकतंच प्रकाशित झालं आहे.अत्यंत मूलगामी असं हे संशोधन असलं तरी अजून अनेक गोष्टी गुलदस्त्यात असून त्यावर पुढील संशोधन सुरू आहे. संगणकावरील या इमेजेस पाहून त्याचं कसं अॅनालिसिस करायचं हे या कंम्प्यूटर सिस्टिमला शिकवण्यात आलं आहे.रुग्णाचं आणि त्याच्या वेगवेगळ्या अवयवांचं आयुष्य किती हे अचूकपणे सांगणं हे सध्या तरी डॉक्टरांच्या आवाक्याबाहेर आहे, पण या संशोधनामुळे अशा रुग्णांवर त्यांना अधिक लक्ष देता येऊ शकेल आणि त्यांच्यावरील उपचाराची दिशाही निश्चित करता येऊ शकेल. हे कंम्प्युटर प्रोग्रामिंग रुग्णाचे फोटो पाहून नेमकं कशाच्या आधारे तुमच्या आयुष्याची भविष्यवाणी वर्तवतो हे अजून स्पष्ट झालेलं नसलं तरीही शरीराच्या पेशीजालाला आलेल्या सुजेसारखे जुनाट विकार आणि रक्तसंचयामुळे हृदयात होणारे बिघाड यासारख्या विकारांवर ही संगणकप्रणाली खात्रीने तुमच्या आयुष्याची भविष्यवाणी वर्तवू शकते असं या शास्त्रज्ञांचं म्हणणं आहे.अलीकडच्या काळात हार्ट अटॅक आणि इतरही अनेक गंभीर विकारांच्या संदर्भातील रुग्णांबाबत त्यांच्या आयुष्याची दोरी किती बळकट आहे याची भविष्यवाणी हा संगणक वर्तवू शकेल. त्यामुळे अशा आजारांचं लवकर निदान होऊन या रुग्णांना वेळेवर औषधोपचार मिळेल आणि त्यांना जीवदान मिळू शकेल अशीही शास्त्रज्ञांना खात्री आहे.