प्रचार रथावर आरटीओंचा वॉच

परभणी : प्रचाररथावर प्रादेशिक परिवहन अधिकाऱ्यांची नजर राहणार असून यासाठी त्यांची परवानगी घेणे आवश्यक असल्याचे आदेश निवडणूक विभागाच्या वतीने काढण्यात आले आहेत.

परभणी : विधानसभा निवडणुकीत उमेदवारांचा प्रचार करण्यासाठी तयार करण्यात येणाऱ्या प्रचाररथावर प्रादेशिक परिवहन अधिकाऱ्यांची नजर राहणार असून यासाठी त्यांची परवानगी घेणे आवश्यक असल्याचे आदेश निवडणूक विभागाच्या वतीने काढण्यात आले आहेत. विधानसभा निवडणुकीच्या प्रचाराची रणधुमाळी सुरु झाली आहे. आता जाहिरातबाजीला प्रचंड उधाण येणार आहे. निवडणुकीच्या काळात प्रचारासाठी वाहनांना हात, कमळ, धनुष्यबाण, घड्याळ, रेल्वे इंजिन, कपबशी, सिलिंडर असे आकार देऊन किंवा निवडणूक उमेदवारांचे फलक लावलेली वाहने शहरातील विविध भागातून किंवा चौका-चौकातून फिरताना दिसतील. या प्रभावी प्रचार यंत्रासाठी वाहनांच्या अंतर्गत रचनेत कोणताही बदल करण्याची परवानगी नसते. मात्र वाहनाच्या बाह्य स्वरुपात मात्र बदल करता येतो. अनेक उमेदवार आपल्या राजकीय पक्षाच्या निवडणूक चिन्हाचे आकार वाहनांना देतात. तर काही जण वाहनांवर केवळ फलक, पोस्टर लावून मतदारांना आकर्षित करण्याचा प्रयत्न करतात. मागील निवडणुकीपर्यंत प्रादेशिक परिवहन अधिकारी कार्यालयाचे याकडे लक्ष नव्हते. परंतु; याकडे आता कडक कारवाई करण्याच्या सूचना परिवहन आयुक्तांनी दिल्या आहेत. ‘प्रचाररथ’ किंवा जाहिरात लावलेली वाहने तयार करण्यासाठी उमेदवारांना निवडणूक आयोगानंतर मोटार वाहन कायद्यानुसार आरटीओची परवानगी घेणे बंधनकारक आहे. वाहनाची सर्व कागदपत्रे योग्य आहेत का? वाहनाच्या बाह्य रचनेतील बदल चालकाच्या दृष्टीक्षेपात बाधा तर येत नाही ना, अशा घटकाची तपासणी आरटीओंकडून केली जाणार आहे. याबाबतचे पत्र परिवहन आयुक्तांनी सर्व आरटीओ कार्यालयांना दिल्याने सर्वत्र खळबळ उडाली आहे. या प्रकरणी आता आरटीओ विभागाकडून कशी अंमलबजावणी होते, याकडे नागरिकांचे लक्ष लागले आहे. (जिल्हा प्रतिनिधी) वाहनांवरील जाहिरातींचे नियमव्यावसायिक वाहनांबाबत नियमांचे पालन करणे आवश्यक आहे. जाहिरातीसाठी पीडीडीए या नमुन्यात अर्ज स्वीकरण्यात येतात. वाहनाच्या दोन्ही बाजुंना जाहिराती लावण्याची मुभा आहे. वाहनाच्या दर्शनी भागावर जाहिराती लावण्यास बंदी आहे. जाहिरात वाहनाच्या लांबी, रुंदी पेक्षा जास्त नसावी, जाहिरातीमुळे वाहनाचे हेडलाईट, टेललाईट, इंडिकेटर, रियरव्हयू मिरर, नंबर प्लेट आदी अच्छादित होणार नाही, याची काळजी घेतलीे पाहिजे. पक्षाचा झेंडा वाहन चालकाच्या दृष्टीसमोर नसावा. चकाकणाऱ्या, प्रकाशमान जाहिरातीवर निर्बंध व वाहनांवर ३.८ मीटर उंचीपर्यंत जाहिरात लावण्यास मंजुरी देण्यात आली आहे.