सेलूत आणखी दोघांची दुचाकी चोरली

सेलू शहरातील आदर्शनगर भागातील सुयश अशोकराव पटवारी यांनी त्यांची एमएच- २२ एएच- ५२९७ क्रमांकाची दुचाकी ४ एप्रिल रोजी सायंकाळी ७ वाजता घराबाहेर उभी केली होती. अर्ध्या तासानंतर घराबाहेर आल्यानंतर त्यांना त्यांची दुचाकी दिसून आली नाही. त्यांनी दुचाकीचा इतरत्र शोध घेतला असता ती आढळून आली नाही. त्यामुळे त्यांनी सेलू पोलीस ठाण्यात २३ एप्रिल रोजी फिर्याद दिली. त्यावरून अज्ञात चोरट्याविरुद्ध गुन्हा दाखल करण्यात आला आहे. दुसरी घटना शहरातील सरोदेनगर भागात घडली. येथील ज्ञानदेव काशीनाथराव उबाळे यांनी त्यांची एमएच- २२ एक्यू- ५३५२ क्रमांकाची दुचाकी २० एप्रिल रोजी दुपारी ४ वाजता घराबाहेर उभी केली होती. दोन तासांनंतर ते घराबाहेर आले असता त्यांना जागेवर दुचाकी दिसून आली नाही. शोधाशोध करूनही ती सापडली नाही. याबाबत त्यांनी २२ एप्रिल रोजी सेलू पोलीस ठाण्यात तक्रार दिली. त्यावरून अज्ञात चोरट्याविरुद्ध गुन्हा दाखल करण्यात आला आहे. दरम्यान ३ दिवसांपूर्वीच शहरात ३ दुचाकी चोरीस गेल्याची नोंद पोलिसांत करण्यात आली होती. आता पुन्हा दोन दुचाकी चोरीस गेल्या आहेत. असे असताना पोलीस मात्र चोरट्यांना अद्याप पकडू शकले नाहीत.