परभणी येथील उपप्रादेशिक परिवहन कार्यालयात मागील ३ महिन्यांपासून शनिवारी तसेच रविवारी सुटीच्या दिवशी विशेष कॅम्प घेऊन विविध कामांसाठी अर्ज दाखल केलेल्यांना परवाना तसेच प्रमाणपत्र देण्यासाठी उपक्रम हाती घेण्यात आला आहे. मागील ३ महिन्यांत ६ हजार जणांच्या चाचणी करण्यात आल्या तरी अजून ८ ते १० हजार अर्ज प्रलंबित आहेत. यामुळे अनेकांचे लायसन्स रद्द होऊ शकते. यामुळे अनेकांचा श्रम, वेळ आणि पैसा या तिन्ही बाबी वाया जाऊ शकतात. त्यामुळे उपप्रादेशिक परिवहन कार्यालयात सर्वसामान्य नागरिक, अर्जदार खेटे मारून वाहन परवाना व अन्य प्रमाणपत्र मिळविण्यासाठी चौकशी व गर्दी करीत आहेत.
काय आहेत अडचणी
उपप्रादेशिक परिवहन अधिकारी कार्यालयाने त्यांच्या अखत्यारित ऑनलाईन अर्ज केल्यानंतर या सर्व अर्जदारांची चाचणी आणि परीक्षा घेण्याची प्रक्रिया राबविण्यास सुरुवात केली आहे. मात्र, या विभागाकडे असलेले मनुष्यबळ कमी व अपुरे पडत आहे. १२ मोटार वाहन निरीक्षकांपैकी सध्या ५ जण कार्यरत आहेत, तर ६ जागा रिक्त आहेत. एक मोटार वाहन निरीक्षक पनवेल येथे बदलीवर कार्यरत आहेत. यामुळे मोटार वाहन निरीक्षकाच्या उपलब्धतेप्रमाणे ही प्रक्रिया पूर्ण केली जात आहे.
रोजचा कोटा ७० चा
सध्या ऑनलाईन अर्ज केलेल्यांसह ऑफलाईन अर्ज केले, त्यांचा दररोज कमीत कमी ७० जणांचा कोटा निश्चित केला आहे. यानुसार महिन्याकाठी २१०० ते २२०० लायसन्स पूर्ण होत आहेत तसेच कॅम्पद्वारे १०० जणांची प्रक्रिया पूर्ण केली जात आहे.
तारीख मिळालेले येत नाहीत, येणाऱ्यांना तारीख मिळत नाही
उपप्रादेशिक परिवहन अधिकारी कार्यालयाकडे वैयक्तिक ऑनलाईनरीत्या अर्ज केल्यानंतर तारीख मिळाल्यावर १० टक्के अर्जदार हे गैरहजर राहतात. उर्वरित ९० टक्के अर्जदार त्या तारखेला सर्व प्रक्रिया पूर्ण करतात. मात्र, ऑफलाईनरीत्या येणाऱ्यांना तारीख मिळत नसल्याचे अनेक जण सांगत आहेत. काही जणांना मागील दोन महिन्यांपासून तारीख मिळाली नाही.
दैनंदिन दिलेला कोटा आणि त्याव्यतिरिक्त कॅम्पमध्ये दिलेल्या चाचणीच्या उपलब्धतेनुसार नियोजन केले जात आहे. याचा नागरिकांनी व अर्जदारांनी लाभ घ्यावा.
- श्रीकृष्ण नकाते, उपप्रादेशिक परिवहन अधिकारी.
लायसन्स नव्याने काढावे लागणार की काय?
मी दुचाकीचा लर्निंग परवाना काढला आहे. यानंतर कायमस्वरूपी परवान्यासाठी अर्ज आणि पैसे भरले आहेत. मात्र, तारीख मिळाली नसल्याने प्रतीक्षेत आहे.
- भारत निंबाळकर, अर्जदार.
मला दोन महिन्यांपासून पैसे भरूनही अद्याप तारीख मिळाली नाही. यामुळे पैसे वाया जाण्याची भीती आहे. पुन्हा तीच प्रक्रिया करण्यास वेळ लागतो.
- विष्णू कुटे, अर्जदार.