गंगाखेड: भरधाव वेगातील ऑटोरिक्षा उलटून झालेल्या अपघातात साठ वर्षीय वृद्धाचा मृत्यू झाल्याची घटना शुक्रवारी दुपारी तीन वाजेच्या सुमारास मरडसगाव पाटीजवळील चाटोरी रस्त्यावर घडली. आप्पाराव मुंजा सावंत असे मृताचे नाव आहे.
तालुक्यातील बडवणी येथील आप्पाराव मुंजा सावंत त्यांच्या पत्नी जिजाबाई सावंत व अन्य एक असे तिघेजण शुक्रवारी दुपारी तीन वाजेच्या सुमारास प्रवासी ऑटोने चाटोरी येथून गंगाखेडकडे येत होते. दरम्यान, भरधाव वेगातील ऑटो मरडसगाव पाटीजवळील चाटोरी रस्त्यावर उलटला. यात आप्पाराव मुंजा सावंत यांच्या डोक्याला गंभीर जखमी झाली. त्यांना उपचारासाठी गंगाखेड उपजिल्हा रुग्णालयात दाखल करण्यात आले. निवासी वैद्यकीय अधिकारी डॉ. वैशाली देशमुख, डॉ. गुणवंत जगतकर, परिचारीका सुमेधा नागरगोजे, सिता अंभोरे यांनी त्यांच्यावर प्रथमोपचार करून परभणी येथे अधिक उपचारासाठी रवाना केले. मात्र, रुग्णवाहिकेतच त्यांचा मृत्यू झाला. अपघातात जिजाबाई सावंत यांच्या पायाला तर ऑटो चालक मंगेश भिसे याच्या ही हाताला मार लागला आहे.