आयसीयूमधून रोख रकमेसह सोन्याचे दागिने लंपास

जिंतूर तालुक्यातील वर्णा येथील अशोक रामराव अंभोरे यांची आई आजारी असल्याने त्यांनी त्यांना उपचारासाठी शहरातील बस स्थानक परिसरातील परतानी हॉस्पिटल येथे २ सप्टेंबर रोजी उपचारासाठी दाखल केले होते. येथील आयसीयूमधील बेड क्रमांक ५ वर अंभोरे यांच्या आई उपचार घेत असताना, त्यांच्या बेडच्या बाजूला अंभोरे यांच्या सविता व संगीता या दोन बहिणी झोपल्या होत्या, तर अशोक अंभोरे हे बाहेर ओपीडीमध्ये झोपले होते. आईच्या उपचारासाठी त्यांनी भावाकडून घेतलेले ५५ हजार रुपये व सोन्याचे दागिने ठेवले होते. सदरील पैशांची बॅग त्यांच्या बहिणीजवळ ठेवली होती. आयसी वॉर्डमध्ये ६ रुग्ण व त्यांचे नातेवाईक होते. रोख रक्कम व सोन्याचे दागिने असलेल्या बॅगेतून पैसे व रोख रक्कम चोरीस गेल्याची बाब सकाळी ५च्या सुमारास उघडकीस आली. याबाबत अशोक अंभोरे यांनी ६ सप्टेंबर रोजी नवा मोंढा पोलीस ठाण्यात याबाबत तक्रार दिली. त्यावरून अज्ञात चोरट्याविरोधात गुन्हा दाखल करण्यात आला आहे. अधिक तपास पोलीस करीत आहेत.