परभणी : येत्या आठ दिवसांत शहरातील मनपाच्या कल्याण मंडपम् सभागृहात ५०० खाटांचे जंबो कोविड सेंटर उभारण्याची पालकमंत्री नवाब मलिक यांनी केलेली घोषणा हवेतच विरली असून, उद्घाटनाच्या वेळी आणलेल्या खाटा आता गायब झाल्या आहेत. त्यामुळे या केंद्रावर शुकशुकाट दिसून येत आहे.
जिल्ह्यात १ मार्चपासून आतापर्यंत २६ हजार ८८७ रुग्णांची वाढ झाली असून, उपचारांदरम्यान ५४७ जणांचा मृत्यू झाला आहे. जिल्हाभरातील परिस्थिती गंभीर असल्याने २२ एप्रिलला जिल्ह्याच्या दौऱ्यावर आल्यानंतर पालकमंत्री नवाब मलिक यांनी अधिकारी व पदाधिकाऱ्यांची आढावा बैठक घेतली. त्यानंतर जिल्हा कचेरीत घेतलेल्या पत्रकार परिषदेत परभणी शहरातील मनपाच्या कल्याण मंडपम् येथील सभागृहात ५०० खाटांचे जम्बो कोविड सेंटर आठ दिवसांत उभारण्याची घोषणा केली होती. त्यानंतर या कोविड सेंटरचे उद्घाटनही पालकमंत्री मलिक यांच्या हस्ते पार पडले होते. यावेळी जिल्ह्यातील प्रमुख अधिकारी व पदाधिकारी उपस्थित होते. त्यानंतर प्रत्यक्ष काम सुरू असल्याचा अनुभव तिसऱ्याच दिवशी आला होता. नंतरच्या काळात मात्र पडद्यामागे घडामोडी घडल्या आणि अचानक उद्घाटनाच्या वेळी आणलेल्या खाटा वाहनात टाकून रातोरात नेण्यात आल्या. या पार्श्वभूमीवर शुक्रवारी दुपारी दोनच्या सुमारास या कोविड सेंटरला या प्रतिनिधीने भेट देऊन पाहणी केली असता, कल्याण मंडपम् सभागृहात शुकशुकाट दिसून आला. येथील सर्व खाटा गायब होत्या. काही दिवसांपूर्वी पार्टीशयनचे काम करणारे कर्मचारीही गायब होते. त्यामुळे पालकमंत्र्यांनी आठ दिवसांत कोविड सेंटर उभारण्याची केलेली घोषणा हवेतच विरल्याचा प्रत्यय अनुभवयास आला. विशेष म्हणजे पालकमंत्री नवाब मलिक हे १ मे रोजी पुन्हा जिल्हा दौऱ्यावर येत आहेत. आता त्यांनी केलेल्या घोषणेप्रमाणे येथे कोविड सेंटरची उभारणी का झाली नाही? याचे उत्तर मिळणार का असा सवाल उपस्थित होत आहे.
दरम्यान, या संदर्भात मनपा आयुक्त देविदास पवार यांच्याशी मोबाईलवर संपर्क साधला असता, बराच वेळ फोन करूनही त्यांनी प्रतिसाद दिला नाही.
कल्याण मंडपम् येथील कोविड सेंटरला ऑक्सिजनची लाईन असल्याशिवाय सुरुवात करता येत नाही. दोन दिवसांत ही लाईन टाकून ऑक्सिजनच्या १०० बेडची व्यवस्था येथे केली जाणार आहे. उर्वरित सर्वसाधारण बेड राहणार आहेत. येथे आणलेल्या खाटा व्यवस्थित नव्हत्या. त्यामुळे त्या संबंधित कंत्राटदाराला परत केल्या आहेत.
दीपक मुगळीकर, जिल्हाधिकारी
पालकमंत्र्यांनी केले होते उद्घाटन
कोविड केअर सेंटरची उभारणी न करताच अर्ध्या दिवसाच्या दौऱ्यावर आलेल्या पालकमंत्र्यांनी घाईघाईत कल्याण मंडपम् येथील ५०० खाटांच्या कोविड सेंटरचे उद्घाटन २२ एप्रिल रोजी केले होते. यावेळी त्यांच्यासमवेत जिल्ह्यातील दिग्गज नेते उपस्थित होते. गेल्या आठ दिवसांत कोविड केअर सेंटर का कार्यान्वित झाले नाही, याचा जाब मात्र या नेतेमंडळींनी प्रशासनास विचारलेला नाही.