गंगाखेड: पोस्ट ऑफिस परिसरात गुरुवारी मध्यरात्री २ वाजेच्या जखमी अवस्थेत आढळेल्या तरुणाचा शुक्रवारी (दि. १ ) पहाटे उपचारादरम्यान मृत्यू झाला. या घटनेने खळबळ उडाली असून शहरात तणावपूर्ण वातावरण आहे.
शहरातील पोस्ट ऑफिस परिसरात गुरुवारी (दि. ३१) मध्यरात्री २ वाजेच्या सुमारास संतोष हनुमानदास खंडेलवाल ( ३३, रा. गंगाखेड) या तरुणाला मारहाण झाल्याची घटना घडली. गस्तीवरील पोलीस कर्मचारी सुनील लोखंडे यांना याची माहिती मिळाली. यानंतर जमादार एस.एम. बेग व गृहरक्षक दलाच्या जवानांनी संतोषला गंगाखेड उपजिल्हा रुग्णालयात उपचारासाठी दाखल केले. निवासी वैद्यकीय अधिकारी डॉ. वैशाली देशमुख, परिचारिका माला घोबाळे, सुनंदा हटकर यांनी गंभीर जखमी संतोषवर प्राथमिक उपचार केले. डोक्याला गंभीर मार लागल्याने संतोषाचा मोठ्याप्रमाणात रक्तस्त्राव होत होता, यामुळे त्याला अधिक उपचारासाठी नांदेडयेथील रुग्णालयात हलविण्यात आले.
मात्र उपचारादरम्यान शुक्रवारी पहाटे त्याचा मृत्यू झाला. या घटनेने शहरात खळबळ उडाली आहे. कायदा व सुव्यवस्थेचा प्रश्न निर्माण होऊ नये यासाठी पोलीस बंदोबस्तात वाढ करण्यात आली आहे. नांदेडयेथून मृतदेह आल्यानंतरच याप्रकरणी गुन्हा दाखल करण्यात येणार असल्याची माहिती आहे.