परभणी : श्रीराम मंदिर निर्माण निधी समर्पण अभियानात प्रत्येक राष्ट्रप्रेमी नागरिकांनी आपला निधी आणि ठरावीक वेळ समर्पित करावा, असे आवाहन भाजपाचे महानगर जिल्हाध्यक्ष आनंद भरोसे यांनी केले.
येथील गांधी पार्क भागातील श्री राजाराम मंदिर येथून गुरुवारी श्रीराम मंदिर निर्माण निधी समर्पण महाअभियान सुरू करण्यात आले. या अभियानाचे उद्घाटन आनंद भरोसे यांच्या हस्ते झाले. याप्रसंगी ते बोलत होते. भरोसे म्हणाले, १५ जानेवारी ते १५ फेब्रुवारी या एक महिन्याच्या काळात अभियान राबविले जाणार आहे. महिनाभर प्रत्येकाने दोन तासांचा वेळ समर्पित करून आपली सेवा रुजू करावी, असे आवाहन भरोसे यांनी केले.
याप्रसंगी विश्व हिंदू परिषदेचे प्रांत अध्यक्ष अनंत पांडे, डॉ. संजय टाकळकर यांच्यासह नगरसेवक मधुकर गव्हाणे, पमू सोनी, सतीश नारवानी, दीपक टाक, दिनेश नरवाडकर, माऊली पोहंडूळकर, उदय जैन, रामदेव ओझा, विलास चांदवडकर, अजय फुलारी, सुरेंद्र टाक, अमोल डहाळे, सुप्रिया कुलकर्णी आदींची उपस्थिती होती.
पुढील एक महिन्याच्या कालावधीत प्रत्येकाने दररोज किमान पाच परिवाराला भेट देऊन या अभियानात सहभाग नोंदवावा, असे आवाहन अनंत पांडे यांनी केले. कार्यक्रमास पदाधिकारी उपस्थित होते.