नांदेड येथील पीडित युवती ८ ऑक्टोबर २०१५ रोजी पूर्णा तालुक्यातील गंगाजीबापु देवस्थान येथे दर्शनासाठी आली होती. दर्शन घेऊन परत नांदेडला जात असताना आरोपी शेख शौकत शेख शरीफोद्दीन याने तिला धमकी देऊन बळजबरीने मोटारसायकलवर बसविले. पीडितेला पालम येथे स्वतःच्या घरी डांबून ठेवत तिच्यावर बलात्कार केला. दुसऱ्या दिवशी सकाळी पालम पोलिसांनी पीडितेची सुटका केली होती. त्यानंतर पीडितेने पालम पोलीस ठाण्यात दिलेल्या तक्रारीवरून आरोपीविरुद्ध बलात्काराचा गुन्हा नोंद झाला होता.
तपासी अंमलदार ए. जी. कोलते, शेजवळ यांनी तपास करून दोषारोपपत्र न्यायालयात दाखल केले. या प्रकरणात सरकार पक्षाच्या वतीने ८ साक्षीदार तपासण्यात आले. त्यात फिर्यादी व वैद्यकीय अधिकारी यांची साक्ष महत्त्वपूर्ण ठरली. साक्षीपुराव्याअंती तिसरे सत्र न्यायाधीश डी. व्ही. कश्यप यांनी आरोपी शेख शौकत शेख शरीफोद्दीन यास दोषी ठरवत कलम ३७६ अन्वये सात वर्षे सश्रम कारावास व पाच हजार रुपये दंड, कलम ३६६ अन्वये सात वर्षे सश्रम कारावास व पाच हजार रुपये दंड, कलम ५०६ भादंवि अन्वये २ वर्षे सश्रम कारावास व ५ हजार रुपये दंड अशी शिक्षा सुनावली. तसेच दंडातील रकमेपैकी १० हजार रुपये पीडितेस आर्थिक साह्य म्हणून देण्याचे आदेश दिले. या प्रकरणात सरकार पक्षाच्या वतीने जिल्हा सरकारी अभियोक्ता ज्ञानोबा दराडे यांच्या मार्गदर्शनाखाली ॲड. मयूर साळापूरकर यांनी बाजू मांडली. त्यांना पैरवी अधिकारी एस. व्ही. मनाळे, टी. एस. राठोड व सूर्यवंशी यांनी मदत केली.