लोकमत न्यूज नेटवर्क
परभणी : ओरिसा तसेच आंध्र प्रदेशच्या सीमेवरील सिरेलू येथून परभणीत विक्रीसाठी आणलेला २२ किलो ७५७ ग्रॅम गांजा पोलीस अधीक्षकांच्या विशेष पथकाने १२ फेब्रुवारी रोजी मध्यरात्री शहरातील बसस्थानक परिसरात जप्त केला आहे. याप्रकरणी ९ जणांविरुद्ध गुन्हा दाखल झाला असून, दोघांना पोलिसांनी ताब्यात घेतले आहे. शहरात विक्री करण्यासाठी काहींनी गांजा आणल्याची माहिती पोलीस अधीक्षकांच्या विशेष पथकाला मिळाली. त्यावरुन पथकातील कर्मचाऱ्यांनी दिवसभर शोध मोहीम राबवली. गांजा घेऊन आलेेले काहीजण बसस्थानक परिसरातील एका लॉजमध्ये थांबल्याची माहिती मिळाल्यानंतर त्या ठिकाणी जाऊन कारवाई करण्यात आली. यावेळी १ लाख १३ हजार ७८५ रुपये किमतीचा २२ किलो ७५७ ग्रॅम गांजा, एक दुचाकी, एक मोबाईल पोलिसांनी जप्त केला आहे. विकास संजय दाभाडे आणि युवराज रुक्माजी भदर्गे (रा. परतूर) यांना पोलिसांनी ताब्यात घेतले आहे. ओरिसा तसेच आंध्र प्रदेशच्या सीमेवरील सिलेरु येथून हा गांजा आणल्याची माहिती या दोघांनी दिली. याप्रकरणी विकास संजय दाभाडे, युवराज रुक्माजी भदर्गे, आंध्र प्रदेशातील डंबरु, प्रकाश काळे, युसूफ शेख, शफू, दीपक, प्रदीप फुलमाळे आणि एका महिला आरोपीविरोधात कोतवाली पोलीस ठाण्यात गुन्हा दाखल करण्यात आला आहे.
सहाय्यक पोलीस अधीक्षक अविनाशकुमार, पोलीस उपअधीक्षक बापुराव दडस, उपनिरीक्षक चंद्रकांत पवार, विश्वास खोले, सुग्रीव केंद्रे, नीलेश भुजबळ, यशवंत वाघमारे, शंकर गायकवाड, अजहर पटेल, दीपक मुदीराज, विष्णू भिसे, अरुण कांबळे, दीपक मुंढे, आरेफ कुरेशी, कोतवाली पोलीस ठाण्याचे सहायक पोलीस निरीक्षक विवेकानंद पाटील, कर्मचारी आईटवाड, लटपटे, वाघमारे, गायकवाड, रामा कदम यांनी ही कारवाई केली.
हैदराबादमार्गे आरोपींचा प्रवास
परभणीत गांजासह पकडलेल्या आरोपींनी हैदराबाद, विशाखापट्टनम्, नांदेड, परतूरमार्गे परभणीपर्यंतचा प्रवास केला. परभणी शहरात हा गांंजा विक्री करण्याच्या उद्देशाने आणला होता, असे पोलिसांनी सांगितले.