पोखर्णी - परभणी तालुक्यातील पोखर्णी नृसिंह येथील ग्रामपंचायतीसाठी शुक्रवारी झालेल्या मतदानावेळी सकाळपासूनच मतदारांच्या रांगा लागल्या होत्या. मतदारांमध्ये सकाळपासूनच मतदानासाठी उत्साह दिसत होता. याठिकाणी २ हजार ६८५ मतदारांनी मतदानाचा हक्क बजावला.
एकूण ११ सदस्य असलेल्या या ग्रामपंचायतीत २४ उमेदवार आपले नशीब आजमावत आहेत. शुक्रवारी सकाळी साडेसात वाजल्यापासूनच मतदान केंद्रावर मतदारांनी रांगा लावल्या होत्या. दैठणा पोलिसांकडून पुरेसा बंदोबस्त ठेवण्यात आला होता. चार प्रभागांमध्ये विभागलेल्या एकूण ३ हजार ३६१ मतदारांपैकी २ हजार ६८५ जणांनी मतदान केले. येथील मतदानाची टक्केवारी ८२ टक्के आहे. बाहेरगावी असलेल्या मतदारांना आणण्यासाठी उमेदवारांनी नियोजन केले होते. दोन दिवसांपासून गावातील राजकीय वातावरण चांगलेच तापले होते. सर्व उमेदवारांचे भवितव्य शुक्रवारी मशीनमध्ये बंद झाले असून, सोमवारी निकाल लागणार आहे.