इंटर्न आहात आणि ऑफिसात तुम्ही असं वागता?
तुम्ही एखाद्या ऑफिसात इंटर्न म्हणून जॉईन होता.
एकदम चकाचक ऑफिस. आपल्या व्यवसायातली बडीबडी लोकं तिथं काम करतात. या ऑफिसात कधीतरी नोकरी मिळाली पाहिजे असं तुमचं स्वप्न. आणि तिथंच तुम्हाला इटर्नशिप करण्याची संधी मिळते!
काम सुरू!
पण बहुतांश इंटर्न दोन प्रकारच्या चुका हमखास करतात.
काहीजण धास्तावून, जे काम दिलं तेच करत बसतात. तोंडच उघडत नाहीत. काम करुन झालं तर एक काम चारदा करतील पण तोंडाला कुलूप. ते कधी आले कधी गेले कुणाला कळत नाही. त्यांचं काम, आणि ते नोटीसही होत नाहीत.
दुसरे इंटर्न दुसर्‍या प्रकारातले. हल्ली बहुतेक याच स्वभावाचे दिसतात.
एकदम शाईन मारू. सतत बडबड. आपल्याला फार कळतं असा आवेश. तिथं काम करणार्‍या सिनियर्सना आदेश देणं, सल्ले देणं पहिल्या दिवसापासून सुरू! अशा इंटर्नवर मग ‘आगाऊ’ शेरा बसतो आणि नोकरी मिळण्याची शक्यता असली तरी ती पुढे मिळत नाहीच.
असं का होतं तर इंटर्नशिप करताना ऑफिस एटिकेट्स नावाची गोष्टच अनेकांना माहिती नसते! आणि मग अत्यंत मॅनर्सलेसली वागून अनेकजण आपली शोभाच करून घेतात.
हे टाळायचं असेल तर, काही एटिकेट्स इंटर्नशिपपूर्वी घोटून पाठ करून ठेवाच.
१) इंटर्नशिपला वेळेवर जा, ऑफिसात पोहोचल्या पोहोचल्या तक्रार करू नका की, तुमचं ऑफिस किती लांब आहे. किती ट्राफिक होतं, मला इथं यायला किती त्रास झाला. हा तक्रारीचा पाढा एवढंच सांगतो की, तुम्ही इथं काम करायला अनुत्सुक आहात. आणि जरा कामचुकारही आहात.
२) एखादं काम तुम्हाला करायला आवडणार नसेल तरी करा, कारण हा प्रवासच शिकण्याचा असतो. पण अगदीच जमणार नसेल तर अत्यंत नम्रपणे सांगा की, मला करायला आवडलं असतं, पण येत नाही. कसं करू ते सांगा, किंवा सरळ सांगा की, मला दुसरं काम द्या हे नको. पण हे सांगतानाही आवाज हा माफीनाम्याचा असावा आदेशाचा नव्हे.
३) सगळ्यात महत्त्वाचं म्हणजे तुमचे कपडे. ते फॉर्मलच असावेत. तुम्ही कॉलेजात असलात तरी ते ऑफिस आहे. त्यामुळे फॉर्मल कपडे घालायला हवेत. विशेषत: मुलींनी हे लक्षात ठेवावं की, कॉलेज वेगळं, ऑफिस वेगळं.
४) ऑफिसातले सहकारी त्यांच्या कामाविषयी काही बोलत असतील तर मध्येच बोलू नका. कान देऊन ऐकू नका. तुमचा संबंध नसेल तर उगीच फिदीफिदी हसू नका.
५) आपले फोन सायलण्टवर ठेवा. आणि सगळ्यात महत्त्वाचं, आपण इथं काहीतरी शिकायला आलोय हे लक्षात ठेवून सगळ्यांशी म्हणजे अगदी ऑफिसातल्या शिपायापासून ते बॉसपर्यंत सगळ्यांशी नम्रतेनं वागा.