शेलार एफसीचा दणदणीत विजय

निखिल घार्ग याने झळकावलेल्या दोन गोलच्या जोरावर शेलार एफसी संघाने बोरीवली प्रीमियर फुटबॉल लीग स्पर्धेत चँलेंजर्स एफसीचा ३-० असा धुव्वा उडवला.

- लोकमत न्यूज नेटवर्कमुंबई : निखिल घार्ग याने झळकावलेल्या दोन गोलच्या जोरावर शेलार एफसी संघाने बोरीवली प्रीमियर फुटबॉल लीग स्पर्धेत चँलेंजर्स एफसीचा ३-० असा धुव्वा उडवला. या शानदार विजयासह शेलार एफसीने स्पर्धेत विजयी आगेकूच केली आहे. मुंबई जिल्हा फुटबॉल संघटनेच्या (एमडीएफए) मान्यतेने बोरीवली स्पोटर््स फाऊंडेशनच्या वतीने सेंट फ्रान्सीस डी’अ‍ॅसीसी मैदानावर झालेल्या सामन्यात शेलार एफसी संघाने आक्रमक खेळ करत वर्चस्व राखले. सुरुवातील चँलेंजर्सच्या चालींचा अंदाज घेतल्यानंतर शेलार संघाने आपल्या स्ट्रायकर्सच्या जोरावर चँलेंजर्सच्या गोलक्षेत्रात मुसंडी मारण्यास सुरुवात केली.२९व्या मिनिटाला विशाल नायरने केलेल्या शानदार गोलच्या जोरावर शेलार संघाने १-० अशी महत्त्वपुर्ण आघाडी मिळवली. हीच आघाडी मध्यंतरापर्यंत कायम राखत शेलार एफसीने वर्चस्व मिळवले. दुसऱ्या सत्रात चँलेंजर्स संघाकडून जोरदार प्रत्युत्तराची अपेक्षा होती, परंतु शेलार एफसी संघाच्या भक्कम बचावापुढे त्यांचा निभाव लागला नाही. त्यात, निखिलने यानंतर सर्व सुत्रे आपल्याकडे घेताना ४७व्या आणि ६०व्या मिनिटाला शानदार गोल करुन शेलार संघाच्या विजयावर शिक्कामोर्तब केले.