थॉमस म्यूलरची हॅट्ट्रिक

थॉमस म्यूलर याने नोंदविलेल्या हॅट्ट्रिकच्या बळावर जर्मनीने फिफा विश्वचषक फुटबॉल स्पर्धेतील ‘जी ’ गटाच्या सामन्यात पोर्तुगालवर ४-० ने एकतर्फी विजय नोंदविला.

साल्वाडोर : थॉमस म्यूलर याने नोंदविलेल्या हॅट्ट्रिकच्या बळावर माजी विजेत्या जर्मनीने फिफा विश्वचषक फुटबॉल स्पर्धेतील ‘जी ’ गटाच्या सामन्यात सोमवारी दहा खेळाडूंसह खेळणाऱ्या पोर्तुगालवर ४-० ने एकतर्फी विजय नोंदविला.विश्वचषकात शंभरावा सामना खेळणाऱ्या जर्मनीकडून २०१० च्या फिफा विश्वचषकाचा गोल्डन बूट विजेता म्यूलर याने १२ मिनिटाला मिळालेल्या पेनल्टीचे गोलमध्ये रुपांतर करीत खाते उघडले. इन्ज्युरी टाइममध्ये त्याने पुन्हा एकदा चेंडूला गोलजाळ्याचा मार्ग दाखविला. उत्तरार्धातील खेळात ७८ व्या मिनिटाला तिसरा गोल करीत त्याने ‘हॅट्ट्रिक’ही साधली. चौथा गोल मॅट ह्यूमेल्स याने ३२ व्या मिनिटाला केला. गुडघ्याच्या दुखापतीतून सावरलेला कर्णधार ख्रिस्टियानो रोनाल्डो सामन्यात खेळला खरा मात्र जागतिक क्रमवारीत चौथ्या स्थानावर असलेल्या पोर्तुगालचा एकतर्फा पराभव तो टाळू शकला नाही. खच्चून भरलेल्या प्रेक्षकांच्या साक्षीने आणि स्वत:च्या देशाचे चान्सलर अँजेला मार्केल यांच्या उपस्थितीत दुसऱ्या स्थानावर असलेल्या जर्मनीने कौशल्य व ताकदीचा शानदार समन्वय साधला. संपूर्ण वेळ सामन्यावर वर्चस्व राखणाऱ्या जर्मनीपुढे पोर्तुगालचे खेळाडू असहाय्य दिसले.जर्मनीने पोर्तुगालविरुद्ध मध्यंतरापर्यंत ३-० अशी भक्कम आघाडी मिळविली होती. उभय संघांनी सुरुवातीपासून आक्रमक खेळ केला. जर्मनीने ताळमेळ साधत वर्चस्व गाजविले. जर्मनीतर्फे सर्वप्रथम खेदिराला गोल करण्याची संधी चालून आली, पण त्याला गोलजाळ्याचा वेध घेण्यात अपयश आले. त्यानंतर काही वेळाने पोर्तुगालच्या जी. परेराने पेनल्टी क्षेत्रात जर्मनीचा फारवर्ड मारिया गोट्जे याला नियमबाह्य पद्धतीने रोखले. पंचानी परेराला ताकीद दिली तर जर्मनीला पेनल्टी किक बहाल केली. म्युरलने पेनल्टीवर गोल नोंदवित जर्मनीला आघाडी मिळवून दिली. बरोबरी साधण्यासाठी पोर्तुगाल संघाने आक्रमक खेळ करीत संधी निर्माण केल्या, पण त्यावर त्यांना गोल नोंदविता आला नाही. ३२ व्या मिनिटाला ह्युमेल्सने टोनी क्रुजच्या कॉर्नर किकवर हेडरद्वारे चेंडूला गोलजाळ्याचा मार्ग दाखवित जर्मनीला २-० अशी आघाडी मिळवून दिली. ह्युमेल्सचा हा तिसरा आंतरराष्ट्रीय गोल आहे. हे तिन्ही गोल त्याने हेडरद्वारे नोंदविले, हे विशेष. ३७ व्या मिनिटाला पोर्तुगालला जबर धक्का बसला. पंचानी पेपेला रेड कार्ड दाखवित बाहेर केले. पोर्तुगाल संघ १० खेळाडूंसह खेळत असल्याचा जर्मनी संघाने लाभ घेतला. मध्यंतरापूर्वीच्या इन्ज्युरी टाइममध्ये म्युरलने सामन्यातील दुसरा गोल नोंदवित संघाला ३-० अशी आघाडी मिळवून दिली. (वृत्तसंस्था)