कोलकाता : भारत आणि दक्षिण आफ्रिका यांच्यातील तिसरा टष्ट्वेंटी-२0 क्रिकेट सामना एकही चेंडू न टाकता रद्द करण्यात आला. कोलकात्यात दुपारी झालेल्या पावसामुळे ईडन गार्डनचे मैदान खेळण्यायोग्य नसल्याने रात्री साडेनऊ वाजता सामना होणार नसल्याची घोषणा केली. तीन सामन्यांची ही मालिका दक्षिण आफ्रिकेने २-0 अशी आपल्या नावावर केली आहे. पहिल्या दोन सामन्यांतील पराभवामुळे भारतीय संघ तिसरा सामना जिंकून बाउन्सबॅक करण्यास उत्सुक होता; पण पावसाने ईडन गार्डनवरील प्रेक्षकांची घोर निराशा केली. कोलकात्यात गुरुवारी दुपारी अडीच वाजता जोरदार पाऊस पडला होता. सायंकाळी सहा वाजल्यानंतर पाऊस पूर्णपणे थांबला होता; परंतु दुपारच्या पावसाने मैदानात जागोजागी पाणी साचले होते. क्युरेटर आणि कर्मचाऱ्यांनी तीन सुपरसोकर मशीन लावून मैदान खेळण्यायोग्य करण्याचा प्रयत्न केला; पण आउटफिल्ड खेळण्यास योग्य नसल्याचे पंचांचे मत बनले. पंचांनी साडेसात, साडेआठ आणि शेवटी साडेनऊ वाजता असे तीनदा मैदानाचे निरीक्षण केले. त्यानंतर सामना रद्द करण्याचा निर्णय घेण्यात आला.
पावसामुळे तिसरा सामना रद्द
By admin | Updated: October 9, 2015 05:00 IST