पी.व्ही. सिंधू, के. श्रीकांत दुसऱ्या फेरीत

भारताची पी. व्ही. सिंधू आणि किदांबी श्रीकांतने आपापल्या प्रतिस्पर्ध्यांचा पराभव करून अनुक्रमे महिला व पुरुष गटाच्या जागतिक बॅडमिंटन अजिंक्यपद स्पर्धेच्या दुसऱ्या फेरीत प्रवेश केला.

जकार्ता : भारताची पी. व्ही. सिंधू आणि किदांबी श्रीकांतने आपापल्या प्रतिस्पर्ध्यांचा पराभव करून अनुक्रमे महिला व पुरुष गटाच्या जागतिक बॅडमिंटन अजिंक्यपद स्पर्धेच्या दुसऱ्या फेरीत प्रवेश केला. या स्पर्धेत दोन वेळा (२०१३ व २०१४) कांस्यपदक जिंकलेल्या ११ व्या मानांकित सिंधूने चुरशीच्या झालेल्या लढतीत डेन्मार्कच्या लाइन जार्सफेल्टचा ११-२१, २१-१७, २१-१६ गुणांनी पराभव करीत दुसऱ्या फेरीतील आपली जागा निश्चित केली. विश्व क्रमवारीत १३ व्या नंबरवर असलेली सिंधू या सत्रात दुखापतीमुळे त्रस्त होती.तिसऱ्या फेरीत बाय मिळालेली सिंधू उपउपांत्यपूर्व फेरीत आॅलिम्पिक विजेती व नंबर वन खेळाडू चीनची ली शुएरुईविरुद्ध खेळेल. विश्व क्रमवारीत तिसऱ्या क्रमांकावर असलेल्या भारताच्या श्रीकांतने पुरुष एकेरीत आॅस्ट्रेलियाच्या मायकल फरिमनला २१-१०, २१-१३ गुणांनी फक्त २४ मिनिटांत नमवून दुसऱ्या फेरीत प्रवेश केला. इंडियन ओपन विजेता श्रीकांतला पुढच्या फेरीत चिनी तैपेईच्या सू जेन हाओविरुद्ध खेळावे लागणार आहे. (वृत्तसंस्था)