लिस्बन : स्टार स्ट्रायकर ख्रिस्तियानो रोनाल्डोने केलेल्या दोन शानदार गोलच्या जोरावर बलाढट्य पोर्तुगालने फिफा विश्वचषक २०१८ पात्रता फेरीत विजयी कूच करताना लात्वियाला ४-१ असे लोळवले. रोनाल्डोच्या आक्रमक खेळापुढे लात्वियाचा निभाव लागला नाही.रविवारी रात्री झालेल्या या सामन्यात रोनाल्डोने आपला जलवा दाखवताना पोर्तुगालसाठी निर्णायक कामगिरी केली. २८व्या मिनिटाला त्याने पेनल्टी कॉर्नरचे गोलमध्ये रूपांतर करताना पोर्तुगाला १-० अशी आघाडी मिळवून दिली. हीच आघाडी पहिल्या सत्रापर्यंत कायम ठेवून मध्यंतराला पोर्तुगालने सामन्यावर नियंत्रण राखले. दुसऱ्या सत्रात मात्र पोर्तुगालने आणखी वेगवान खेळ केला. तसेच, लात्वियानेदेखील तोडीस तोड खेळ करताना पोर्तुगालला रोखण्याचा प्रयत्न केला. ६७व्या मिनिटाला आर्टर्स जूजिस याने शानदार गोल करून लात्वियाला १-१ अशी महत्त्वपूर्ण बरोबरी साधून दिली. यानंतर ३ मिनिटांनी मिडफिल्डर विल्यम कार्वाल्हो याने गोल करून पोर्तुगालला २-१ अशा आघाडीवर नेले. तर, पुन्हा एकदा रोनाल्डोने सर्व सूत्रे आपल्याकडे घेताना ८५व्या मिनिटाला जबरदस्त गोल करून पोर्तुगालची आघाडी ३-१ अशी भक्कम केली. यासह रोनाल्डोने आपल्या आंतरराष्ट्रीय गोलची संख्या ६८वर नेली. रोनाल्डोच्या या कामगिरीनंतर ९२व्या मिनिटाला डिफेंडर ब्रुनो एल्वेस याने गोल करून पोर्तुगालच्या एकतर्फी विजयावर शिक्कामोर्तब केले. या शानदार विजयासह पोर्तुगालने ४ सामन्यांतून ९ गुणांची कमाई केली आहे. तसेच, ‘ब’ गटात अव्वल स्थानी असलेल्या स्वित्झर्लंडनंतर पोर्तुगालने दुसऱ्या स्थानी झेप घेतली. (वृत्तसंस्था)
पोर्तुगालकडून लात्विया पराभूत
By admin | Updated: November 15, 2016 01:00 IST