गुडमॉर्निंग स्पोटर््स क्लबची विजेतेपदाला गवसणी

ओम ज्ञानदीप मंडळाच्या वतीने झालेल्या राज्यस्तरीय आमदार चषक कबड्डी स्पर्धेत मुंबईच्या गुडमॉर्निंग स्पोटर््स क्लबने दबदबा राखताना शानदार विजेतेपद पटकावले.

मुंबई : ओम ज्ञानदीप मंडळाच्या वतीने झालेल्या राज्यस्तरीय आमदार चषक कबड्डी स्पर्धेत मुंबईच्या गुडमॉर्निंग स्पोटर््स क्लबने दबदबा राखताना शानदार विजेतेपद पटकावले. स्पर्धेत आश्चर्यकारक आगेकूच करणाऱ्या रायगडच्या बीकेएम क्रीडा मंडळाचे कडवे आव्हान २३-१३ असे परतावून गुडमॉर्निंग संघाने बाजी मारली.प्रभादेवी येथील एकनाथ ठाकूर क्रीडा नगरीमध्ये झालेल्या या अंतिम सामन्यात सुरुवातीपासूनच गुडमॉर्निंग संघाने आपले वर्चस्व राखले होते. आक्रमक व खोलवर चढाई करण्यात तरबेज असलेल्या बीकेएमचे प्रत्येक आक्रमण रोखताना गुडमॉर्निंगने आघाडी वाढवत ठेवली. मध्यांतराला गुडमॉर्निंगने आघाडी घेत सामन्यावर नियंत्रण मिळवले.दुसऱ्या सत्रात गुडमॉर्निंग संघाने आक्रमक खेळाचे प्रदर्शन केले. दबावाखाली आलेल्या बीकेएम संघाच्या कमजोर संरक्षणाचा फायदा उचलताना सचिन पाष्टे आणि सुनील सावंत यांनी तुफानी व खोलवर चढाया करताना संघाची आघाडी आणखी वाढवली. स्वप्निल भादवणकर आणि संदीप भट यांनी दमदार पकडी करताना बीकेएम संघाला पूर्णपणे हतबल केले. या सांघिक खेळाच्या जोरावर अखेर गुडमॉर्निंग संघाने बीकेएमचा प्रतिकार २३-१३ असा मोडताना विजेतेपदावर दिमाखात कब्जा केला. मितेश पाटील व अनिल कोठेकर यांची कडवी झुंज अखेर बीकेएमचा पराभव टाळू शकली नाही. (क्रीडा प्रतिनिधी)वैयक्तिक विजेते :सर्वोत्कृष्ट खेळाडू : मितेश पाटील (बीकेएम)सर्वोत्कृष्ट आक्रमक : सचिन पाष्टे (गुडमॉर्निंग)सर्वोत्कृष्ट संरक्षक : आरिफ सय्यद अली (पोयसर जिमखाना)