मुंबई : हिृशा दुबे या क्रिकेट क्लब ओफ इंडिया (सीसीआय) संघाच्या खेळाडूने बृहन्मुंबई जिल्हा बॅडमिंटन अजिंक्यपद स्पर्धेच्या तिसऱ्या दिवशी आपला दबदबा राखताना मुलींच्या १५ व १३ वर्षांखालील गटाच्या उपांत्य फेरीत धडक मारली. त्याचवेळी पुजा काचरे, रुद्रा राणे यांनीही १५ वर्षांखालील गटातून आगेकूच केली.हिृशाने जबरदस्त वर्चस्व राखताना १५ वर्षांखालील गटात एकहाती वर्चस्व राखताना साची जुकरचा २१-५, २१-१३ असा धुव्वा उडवला. हिृशाच्या धडाक्यापुढे साचीचा काहीच निभाव लागला नाही. तीच्या आक्रमकतेपुढे साचीने सामन्यात पुनरागमन करण्याचे प्रयत्नही सोडून दिले. त्याच वेळी पुजाने साक्षी शेटेला २१-७, २१-११ असे नमवूण उपांत्य फेरी गाठली, तर रद्राने खुशी कुमारीला २१-१३, २१-१० असा धक्का देत आगेकूच केली.मुलींच्या १३ वर्षांखालील गटातही हिृशाने आपला दबदबा राखला. सुरुवातीपासूनच तुफानी खेळ करताना हिृशाने जान्हवी महालेचा २१-१, २१-७ असा फडशा पाडताना दिमाखात उपांत्य फेरी गाठली, तर १५ वर्षांखालील गटात अपयशी ठरलेल्या साचीने सान्वी मार्डोलकरला २१-६, २१-८ असे पराभूत करून उपांत्य फेरी गाठली. खुशीनेदेखील उपांत्य फेरीत प्रवेश करताना गौरी वैश्यंपायनचे आव्हान २१-१३, २१-७ असे संपुष्टात आणले, तर अन्य सामन्यात तारिनी सुरीने उत्कर्ष सिन्हाचे आव्हान २१-८, २१-१० असे परतावून उपांत्य फेरीतील जागा निश्चित केली. (क्रीडा प्रतिनिधी)
हिृशा दुबेची दुहेरी आगेकूच
By admin | Updated: July 28, 2016 00:24 IST