देवेंद्रो सिंग उपांत्य फेरीत

भारताच्या देवेंद्रो सिंग याने उलानबटोर कप बॉक्सिंग स्पर्धेत उपांत्य फेरी गाठून भारतासाठी एक पदक निश्चित केले

नवी दिल्ली : भारताच्या देवेंद्रो सिंग याने उलानबटोर कप बॉक्सिंग स्पर्धेत उपांत्य फेरी गाठून भारतासाठी एक पदक निश्चित केले. स्पर्धेत ५२ किलो वजनी गटातून सहभागी झालेला देवेंद्रो राष्ट्रकुल स्पर्धेतील रौप्य पदक विजेता आहे. या शानदार कामगिरीसह देवेंद्रोने यंदाचे पहिले वैयक्तिक आंतरराष्ट्रीय पदकही निश्चित केले. गतवर्षापासून फ्लाइटवेट गटात खेळण्याचा निर्णय घेतलेल्या देवेंद्रोने रशियाच्या दिमित्री युसुपोवचे आव्हान संपुष्टात आणताना दिमाखात उपांत्य फेरी निश्चित केली. विशेष म्हणजे, निवड चाचणी फेरीत पराभूत झाल्यानंतर देंवेंद्रोला या वर्षाच्या सुरुवातीला झालेल्या आशियाई अजिंक्यपद स्पर्धेला मुकावे लागले होते. मात्र, या शानदार कामगिरीसह आता त्याचा आत्मविश्वास दुणावलेला असेल. दुसरीकडे, अन्य सामन्यात किंग्ज कप कांस्य पदक विजेता रोहित टोकसचे ६४ किलो वजनी गटातून आव्हान संपुष्टात आले. मंगोलियाच्या चिनजोरिग बतारसुखविरुद्ध त्याला पराभवाचे तोंड पहावे लागले.