शिवशक्तीचा विजेतेपदावर कब्जा

आक्रमक सुरुवात करताना शेवटपर्यंत वर्चस्व राखलेल्या सामन्यात बलाढ्य शिवशक्ती संघाने तुल्यबळ मुंबई पोलिसांना २७-१० अशी सहजपणे मात

मुंबई : आक्रमक सुरुवात करताना शेवटपर्यंत वर्चस्व राखलेल्या सामन्यात बलाढ्य शिवशक्ती संघाने तुल्यबळ मुंबई पोलिसांना २७-१० अशी सहजपणे मात देत सहयोग मित्र मंडळाच्या वतीने झालेल्या राज्यस्तरीय महिला कबड्डी स्पर्धेचे दिमाखात विजेतेपद पटकावले. दादर येथील दीनानाथ दलाल मैदानात मुंबई जिल्हा कबड्डी संघटनेच्या मान्यतेने पार पडलेल्या या स्पर्धेतील अंतिम सामना एकतर्फी झाला. शिवशक्तीच्या अपेक्षा टाकळेने स्पर्धेतील धडाका अंतिम सामन्यात देखील कायम राखताना पहिल्याच चढाईत पोलिसांच्या मध्यरक्षकाला बाद करीत संघाला आघाडी मिळवून दिली. त्याचवेळी पोलिसांच्या भक्ती इंदुलकरने बोनस गुण घेताना शिवशक्तीला जोरदार प्रत्युत्तर दिले.यानंतर मात्र शिवशक्तीच्या उजव्या कोपऱ्यावरील रेखा सावंत आणि डाव्या कोपऱ्यावरील ॠतुजा देऊलकर या रक्षकांनी भक्कम संरक्षक करताना मुंबई पोलिसांना गोंधळून टाकले. या दोघींच्या जोरावर शिवशक्तीने मध्यंतराला १४-७ अशी आघाडी घेत सामन्यावर वर्चस्व राखले. दुसऱ्या सत्रात भक्ती आणि शिरीषा शेलार यांनी उत्कृष्ट खेळ करताना पोलिसांचा डाव सावरण्याचा प्रयत्न केला. दरम्यान, भक्तीची पकड करताना शिवश्क्तीची मंगला माने जयाबंदी झालेली, मात्र तरीदेखील ती खेळली आणि पुन्हा एकदा भक्तीची यशस्वी पकड केलीे. यानंतर पोलिसांनी पुनरागमनाचे प्रयत्न सोडल्याने शिवशक्तीने विजेतेपदावर नाव कोरले. (क्रीडा प्रतिनिधी)