लोकमत न्यूज नेटवर्कपनवेल : पनवेल तालुक्यातील खारपाडा ते साई गावाकडे जाणाऱ्या रस्त्यावर रविवारी रात्री वाहनाच्या धडकेमुळे मोटारसायकलवरील एक तरुण ठार, तर त्याचा सहकारी गंभीर जखमी झाल्याची घटना घडली. या अपघातानंतर मोटारसायकलला धडक देणारा वाहनचालक पळून गेला असून, पनवेल तालुका पोलिसांनी त्याच्याविरोधात गुन्हा दाखल करून त्याचा शोध सुरू केला आहे. या घटनेतील मृत तरुणाचे नाव रूपेश ज्ञानेश्वर कातकरी (२७), असे असून, तो पनवेलमधील भोकरवाडी आदिवासीवाडीमध्ये राहत होता. रूपेश आपला मित्र शिवदास कृष्णा पाटील याच्यासह मोटारसायकलवरून खारपाडा येथून साई गावाकडे जात होता. या वेळी वाहनाने त्यांच्या मोटारसायकलला जोरदार धडक दिली. त्यामुळे मोटारसायकलवरील रूपेश आणि शिवदास हे दोघेही गंभीर जखमी झाले. त्यामुळे या दोघांना पनवेलमधील ग्रामीण रुग्णालयात नेण्यात आले. रूपेशच्या डोक्याला गंभीर दुखापत झाल्याने रुग्णालयात नेण्यापूर्वीच त्याचा मृत्यू झाला. या अपघातातील रूपेशचा जखमी मित्र शिवदास याला खासगी रुग्णालयात दाखल केले आहे.
वाहनाच्या धडकेने तरुण ठार
By admin | Updated: June 29, 2017 02:57 IST