पावसाळी नाल्यांमध्ये सांडपाणी

नवीन पनवेल नोडकरिता स्वतंत्र मलनिस्सारण केंद्र नसल्याने सांडपाणी पावसाळी नाल्यांमध्ये सोडण्यात येत आहे. त्याच त्रास नवीन पनवेलकरांपेक्षा कामोठेतील रहिवाशांना सर्वाधिक होत आहे.

कळंबोली : नवीन पनवेल नोडकरिता स्वतंत्र मलनिस्सारण केंद्र नसल्याने सांडपाणी पावसाळी नाल्यांमध्ये सोडण्यात येत आहे. त्याच त्रास नवीन पनवेलकरांपेक्षा कामोठेतील रहिवाशांना सर्वाधिक होत आहे. यामुळे दुर्गंधी येत आहे, त्याचबरोबर स्थानिक रहिवासांचे आरोग्य धोक्यात आले आहे. याप्रकरणी प्रदूषण नियंत्रण महामंडळाकडूनही कोणतीही कारवाई करण्यात येत नाही. त्यामुळे भारत स्वच्छ अभियानाचाही बोजवारा उडाला आहे. नवीन पनवेलला १९ आणि खांदा वसाहतीत १४ सेक्टर असे एकूण ३३ सेक्टर या नोडमध्ये आहेत. एकूण ४० एमएलडी पाण्याची आवश्यकता नवीन पनवेल आणि खांदा वसाहतीत आहे. घनकचरा व्यवस्थापन शास्त्रशुध्द पध्दतीने होत नाहीच, त्याचबरोबर सांडपाण्यावर सुध्दा प्रक्रिया होत नसल्याचे सत्य उजेडात आले आहे.नवीन पनवेल वसाहतीचे डिझायन करताना या ठिकाणी मलनिस्सारण केंद्राचे नियोजन करण्यात आले नाही. नवीन पनवेलमध्ये दोन आणि खांदा वसाहत एक असे तीन पंपहाऊस आहेत. खांदेश्वर मंदिराच्या बाजूला असलेल्या पंपहाऊसमध्ये नवीन पनवेल सुध्दा मलमिश्रित आणि सांडपाणी येते. हे पाणी बाजूला असलेल्या पावसाळी नाल्यात सोडले जाते. सेक्टर ७ ते कामोठे खाडी यादरम्यान हा पावसाळी नाला केवळ पावसाचे पाणी वाहून नेण्याकरिता काढण्यात आला आहे. परंतु त्यामध्ये मलमिश्रित पाणी सोडले जात आहे. खांदेश्वर मंदिराच्या बाजूला असलेल्या पंपहाऊसमधून पाइप त्याचबरोबर एक नाल काढून त्यातून हे पाणी थेट नाल्यात सोडले जात आहे. त्यामुळे कामोठे वसाहतीतील नाल्यालगत राहणाऱ्या रहिवाशांचे आरोग्य धोक्यात सापडले आहे. मोठ्या प्रमाणात दुर्गंधी येत आहे, त्याचबरोबर डासांचा प्रार्दुभावही मोठ्या प्रमाणात होत आहे. सेक्टर २४ मधील श्री अपार्टमेंट, बालगणेश, लॅटवेणू, व्दारका सदन, सेक्टर २१ येथील पटेल पार्क, गणेशा सागर, साईराज, शुभम हाइट्स या इमारतीत राहणारे रहिवासी दुर्गंधीमुळे त्रस्त झाले आहेत. विस्टा कॉर्नर परिसरातील रिद्धेश्वर, साईदर्शन या सोसायटीतील रहिवासी सुध्दा त्रस्त आहेत. बाजूला शिव पॅराडाइज ही इमारत असून, येथे पोतदार जम्बो किड्स ही पूर्व प्राथमिक शाळा आहे. या प्ले स्कूलमध्ये शिकणाऱ्या विद्यार्थ्यांचे आरोग्य धोक्यात सापडले आहे. चॅनेलच्या बाजूला सेक्टर ३१ मध्ये बालाजी हाइट्स आणि साईप्रसाद हे टॉवर असून प्रक्रिया न केलेले सांडपाणी चॅनेलमधून वाहत असल्याने त्यांना दुर्गंधीला सामोरे जावे लागत आहे. सेक्टर १८मध्ये परिस्थिती फारशी वेगळी नाही, येथील रहिवासी सुध्दा त्रस्त आहेत.नवीन पनवेल आणि खांदा वसाहतीकरिता स्वतंत्र मलनिस्सारण केंद्र असणे क्र मप्राप्त आहे. कामोठे येथे हा प्रकल्प उभारला असला तरी त्याचा फायदा नवीन पनवेलला कितपत होईल, याबाबत शंका आहे. सिडको बिनधास्तपणे पावसाळी चॅनेलमध्ये पाणी सोडून देते. त्यामुळे कामोठेकरांना त्याचा त्रास सहन करावा लागत आहे. याबाबत त्वरित उपाययोजना करण्यात याव्यात, ही आमची मागणी आहे.-दीपक निकम, पनवेल विधानसभा संघटक, शिवसेना.सिडकोने खारघर, कामोठे, कळंबोलीबरोबरच नवीन पनवेलला स्मार्ट सिटी करण्याची घोषणा केली आहे. मात्र कळंबोली समुद्रसपाटीपासून साडेतीन मीटर खाली आहे, त्याचबरोबर अनेक सुविधांपासून वंचित आहे. त्याचबरोबर नवीन पनवेलचीही स्थिती आहे. विशेषकरून या वसाहतीत एसटीपी प्रकल्प नाही. त्यामुळे पावसाळी नाला आणि गाढी नदीत मलमिश्रित आणि सांडपाणी सोडले जात आहे. - गोपीनाथ भगत, ग्रामपंचायत सदस्य, कामोठे.नवीन पनवेलला मलनिस्सारण केंद्र नाही ही गोष्ट खरी आहे. मात्र कामोठे येथे 80 एमएलडी क्षमतेचे केंद्र उभारण्यात आले आहे. येथे नवीन पनवेल आणि खांदा वसाहतीतील पाणी प्रक्रिया करण्याकरिता पंपिंग करून पाठवले जाते. त्यामुळे फारशी अडचण येत असेल असे वाटत नाही.- सुधाकर विसाळे, अधीक्षक अभियंता, नवीन पनवेल, सिडको.