नवी मुंबई - तरुणीच्या धाडसामुळे सोनसाखळी खेचुन पळणारा चोरट्या हाती लागला आहे. सोनसाखळी खेचून दोघेजण मोटरसायकलवरून पळत असताना तरुणीने एकाला मोटारसायकलवरून खाली खेचले. यादरम्यान त्यांच्यात झटापट सुरु असताना नागरिकांनी तिच्या मदतीला धाव घेतली. याप्रकरणी एपीएमसी पोलिस ठाण्यात दोघांविरोधात गुन्हा दाखल करण्यात आला आहे.
कोपरी येथे सोमवारी रात्री ९.३० च्या सुमारास हा प्रकार घडला आहे. परिसरात राहणारी आर्ची वैश्य (२०) हि बहिणीला मोबाईल खरेदीसाठी चालली होती. यावेळी समोरून मोटरसायकलवर आलेल्या दोघांपैकी पाठीमागे बसलेल्याने तिच्या गळ्यातली सोनसाखळी खेचली. त्यामुळे आर्ची हिने प्रसंग सावधानता दाखवत चैन खेचणाऱ्याच्या हाताला धरून खेचले असता तो खाली पडला. त्यानंतर चोरट्याने तिच्यासोबत झटापट करून पळून जाण्याचा देखील प्रयत्न केला. परंतु आर्चीने धाडसाने त्याच्याशी सामना केला असता हा प्रकार पाहून त्या मार्गाने जाणाऱ्या चिंतामण पवार यांनी तिच्या मदतीला धाव घेऊन चोरट्याला पकडले.
यावेळी त्याचा साथीदार मात्र घटनास्थळावरून पळून गेला. हाती लागलेल्या चोरट्याला नागरिकांनी पोलिसांच्या ताब्यात दिले असता त्याचे नाव सिद्धार्थ मौर्या (२७) असून त्याच्या पळालेल्या साथीदाराचे नाव रोहित तुपे असल्याचे समोर आले. दोघेही कोपर खैरणेचे राहणारे असून त्यांच्यावर एपीएमसी पोलिस ठाण्यात गुन्हा दाखल करण्यात आला आहे. या घटनेत आर्ची हिच्या गळ्याला जखम झाली असतानाही तिने धाडसाने गुन्हेगारांशी चार हात करून एकाला पकडून दिले आहे. त्यामुळे तिच्या धाडसाचे कौतुक पोलिसांनी देखील केले आहे.