दुधाचा टँकर तलावात पलटी

वाशी येथून पनवेलमध्ये आलेल्या दुधाच्या गाडीला अपघात होऊन ती थेट देवाळे तलावात पडल्याने परिसरात एकच खळबळ उडाली.

पनवेल : वाशी येथून पनवेलमध्ये आलेल्या दुधाच्या गाडीला अपघात होऊन ती थेट देवाळे तलावात पडल्याने परिसरात एकच खळबळ उडाली. मंगळवारी पहाटे ४ वाजून ३० मिनिटांच्या सुमारास एमएच ०४, जीसी ८६२३ या क्रमांकाची दुधाची गाडी मुसलमान नाका येथून मिर्ची गल्लीकडे जात होती. या वेळी अचानक समोर आलेल्या दुचाकीला वाचवण्याचा नादात दुधाची गाडी थेट देवाळे तलावात पलटी झाली. पनवेल शहरात वितरण करण्यासाठी आणलेल्या दुधाच्या पिशव्यांचा मोठा साठा या वेळी गाडीत होत्या. दुचाकीस्वाराला वाचविण्याच्या हेतूने चालकाने जोरात वळण घेतल्याने दुधाची गाडी थेट तलावात पलटी झाली. या ठिकाणी उपस्थित प्रत्यक्षदर्शीनी पनवेल महानगरपालिकेला यासंदर्भात माहिती दिल्यानंतर अग्निशमनच्या कर्मचाऱ्यांनी होडीच्या साहाय्याने गाडीतील माल बाहेर काढला. त्यानंतर क्रेनच्या साहाय्याने गाडीही बाहेर काढण्यात आली. अपघातातचालक प्रवीण चव्हाण हा किरकोळ जखमी झाला असल्याची माहिती पनवेल शहर पोलिसांनी दिली. (प्रतिनिधी)