मुंबई : सरकारी नोकरी देण्याचे आमिष दाखवून गरीब व गरजू कुटुंबीयांची फसवणूक करणाऱ्या पोलिसाच्या मुलाला सायन पोलिसांनी बेड्या ठोकल्या आहेत. मनीष यशवंत मोडकर (४७) असे आरोपीचे नाव असून त्याने ३० ते ३५ जणांची फसवणूक केली आहे. मोडकर याचे वडील मुंबई पोलीस दलात काम करत होते. २००२मध्ये त्यांचा मृत्यू झाला. ते पूर्वी नायगाव पोलीस वसाहतीत राहायचे. नोकरी अभावी मोडकरने गरीब व गरजू पालकांची फसवणूक करायचा धंदा सुरू केला. तरुण- तरुणींच्या पालकांना सरकारी नोकरीचे आमिष दाखवत असे. पोलिसांचा मुलगा असल्याने पालकही त्याच्यावर विश्वास ठेवत होते. १० हजार रुपयांपासून ५० हजार रुपयांपर्यंत तो त्यांच्याकडून पैसे उकळत होता. पैसे देऊनदेखील नोकरीबाबत मोडकर काहीच माहिती देत नसल्याचे पालकांच्या लक्षात आले. सायन येथील रहिवासी असलेल्या एका कुटुंबाने पोलीस ठाण्यात धाव घेत याबाबत माहिती दिली. (प्रतिनिधी)
फसवणूक करणारा पोलिसाचा मुलगा जेरबंद
By admin | Updated: March 30, 2017 06:46 IST