घराची भिंत कोसळून पाच जखमी

तुर्भे परिसरातील हनुमाननगर झोपडपट्टीमध्ये धोकादायक घराची भिंत बाजूच्या घरावर कोसळली. या अपघातामध्ये पाच जण जखमी झाले.

नवी मुंबई : तुर्भे परिसरातील हनुमाननगर झोपडपट्टीमध्ये धोकादायक घराची भिंत बाजूच्या घरावर कोसळली. या अपघातामध्ये पाच जण जखमी झाले. त्यांना उपचारासाठी महापालिकेच्या रुग्णालयात दाखल करण्यात आले आहे. त्यात शुभाबाई हिरवे, नताशा हिरवे, जयदीप हिरवे, रितेश हिरवे व शुभम लाडके यांचा समावेश आहे. हिरवे परिवाराच्या बाजूच्या झोपडीचा एक मजला वाढविला होता. बांधकाम धोकादायक झाल्यामुळे काही दिवसांपूर्वी घर रिकामे करण्यात आले होते. मालक बुधवारीच तिथे आले होते. रात्री साडेअकराच्या सुमारास या घराची भिंत हिरवे कुटुंबीयांच्या घरावर कोसळली. यात घरातील चौघे जखमी झाले. येथून जात असलेला शुभम लाडकेही जखमी झाला आहे. या पाचही जणांना उपचारासाठी तत्काळ महापालिकेच्या रुग्णालयात नेण्यात आले आहे. दोन जणांना ट्रॉमा केअर सेंटरमध्ये ठेवण्यात आले आहे.महापालिकेचे विभाग अधिकारी भरत धांडे यांनीही घटनास्थळी भेट देऊन पाहणी केली. अपघातानंतर परिसरातील सामाजिक कार्यकर्ते तय्यब पटेल, शिवाजी जाधव व इतर अनेकांनी रुग्णालयात धाव घेतली. जखमींची प्रकृती स्थिर असल्याची माहिती नागरिकांनी दिली.