सिडको विरोधात पनवेलकरांमध्ये असंतोष

शासनाचा आदेश धाब्यावर बसवून सिडकोने तीन दिवसांपासून पनवेलकरांची कचराकोंडी केली आहे

वैभव गायकर पनवेल : शासनाचा आदेश धाब्यावर बसवून सिडकोने तीन दिवसांपासून पनवेलकरांची कचराकोंडी केली आहे. मनपा क्षेत्रामध्ये कचऱ्याचे ढीग तयार झाले असून साथीचे आजार पसरण्याची शक्यता निर्माण झाली आहे. सिडकोच्या या मनमानी कारभाराविरोधात शहरवासीयांमध्ये तीव्र असंतोष निर्माण झाला आहे. नागरिकांची अडवणूक थांबविली नाही तर सिडकोविरोधात जनआंदोलन उभारण्याची तयारी लोकप्रतिनिधींसह सामाजिक संघटनांनी सुरू केली आहे.शहराचे शिल्पकार म्हणविणाºया सिडकोने नागरिकांच्या सुविधांपेक्षा भूखंड विकून पैसे मिळविण्यास प्रथम प्राधान्य दिले आहे. नवी मुंबईतही सिडकोच्या ताब्यात असलेल्या भागात कधीच योग्य सुविधा दिलेल्या नाहीत. घाईगडबडीमध्ये नोड महापालिकेकडे हस्तांतर करून जबाबदारीतून सुटका करून घेतली. त्याच पद्धतीने पनवेल महापालिकेवर दबाव वाढवून कचºयासह सामाजिक सुविधांच्या जबाबदारीतून सुटका करून घेण्याचा प्रयत्न सुरू केला आहे. याचाच भाग म्हणून कचरा उचलण्याची व साफसफाईची सेवा महापालिकेने हस्तांतर करून घ्यावी यासाठी गडबड केली जात आहे. शासनाने कचरा उचलण्याची जबाबदारी सिडकोचीच असून मार्ग काढण्यासाठी समिती स्थापन केली आहे. परंतु सिडकोने विश्वासात घेतले नसल्याचे कारण सांगून चक्क शासनाचा आदेश धाब्यावर बसविला व बुधवारपासून खारघर ते पनवेलपर्यंतचा कचरा न उचलण्याचा निर्णय घेतला. शहराची कचरा कुंडी व शहरवासीयांची कचरा कोंडी करण्यात आली आहे. अनेक ठिकाणी ८० टक्के रोड कचºयाच्या ढिगाºयाने व्यापला आहे. प्रचंड दुर्गंधी पसरू लागली आहे. नागरिकांना रोडवरून चालणे मुश्कील झाले आहे. कचºयामध्ये भटक्या कुत्र्यांचा वावर वाढला असून अनेक ठिकाणी कुत्रा चावल्याची घटना घडली आहे. खारघर व कळंबोलीमध्ये भटकी कुत्री मागे लागल्यामुळे दोन मोटारसायकलचा अपघात झाल्याची घटना घडली असून सुदैवाने कोणी फारसे जखमी झाले नाही.सिडकोने सुरू केलेल्या मनमानीचे तीव्र पडसाद शहरात उमटले आहेत. राज्य शासनाने दिलेले आदेश एक महामंडळ मान्य करत नाही ही गोष्ट सर्वांना खटकू लागली आहे. राज्य शासन मोठे की सिडको मोठी असा प्रश्न उपस्थित केला जात आहे. सिडकोच्या मनमानीचा नागरिक, सामाजिक संस्थांसह सर्वपक्षीय लोकप्रतिनिधींनी निषेध करण्यास सुरवात केली आहे. स्वत:च्या अहंकारासाठी जनतेला वेठीस धरणे पूर्णपणे चुकीचे आहे. पनवेलकरांची कोंडी केली जाणार असेल तर जनता सिडको विरोधात आंदोलन सुरू करेल. वेळ पडल्यास कचरा सिडको मुख्यालयामध्ये टाकून या घटनेचा निषेध व्यक्त केला जाईल. कचºयाची होळी करून सिडकोच्या विरोधात घोषणाबाजी केली जाईल असा इशाराही नागरिकांनी दिला आहे. कचºयामुळे साथीचे आजार पसरले किंवा नागरिकांच्या आरोग्यास धोका निर्माण झाल्यास त्याची पूर्ण जबाबदारी सिडको प्रशासनाची राहील असा इशाराही नागरिकांनी दिला आहे.