भार्इंदर : सहकार क्षेत्रात अग्रगण्य असलेल्या गुजरातच्या अहमदाबाद येथील अमुल दूध डेअरीच्या अमुल गोल्ड नामक दुधाच्या अर्धा लीटर सीलबंद पिशवीत झुरळ आढळल्याने याप्रकरणी अमुल कंपनीवर गुन्हा दाखल करण्याची मागणी कमलराज वालिया या ग्राहकाने अन्न व औषध प्रशासनासह मीरा रोड पोलिसांना अर्जाद्वारे केली आहे.येथील गोकूळ व्हिलेज गृहसंकुलातील ग्रीन पार्क इमारतीत राहणारे वालिया यांनी ४ जानेवारी रोजी सकाळच्या सुमारास परिसरातील नारायण मिल्क सप्लाय या दूध विक्रेत्याकडून अमुल गोल्ड (बॅच क्र. केव्ही०५०४१५५एए) नामक अर्धा लीटर दुधाची पिशवी खरेदी केली होती. त्या पिशवीतले दूध काढण्यापूर्वीच त्यांना त्यात झुरळ आढळून आल्याने त्यांनी ही बाब दूध विक्रेत्याच्या निदर्शनास आणून दिली. हा प्रकार अमुल डेअरीत थडकल्यानंतर त्याच दिवशी दु. २ वा.च्या सुमारास अमुल डेअरीतून काही व्यक्ती वालिया यांच्या घरी आल्या. त्यांनी त्यांच्याकडे त्या पिशवीची मागणी करून त्यांना तक्रार न करण्यासाठी काही आमिषे दाखविण्यात आली. परंतु, त्याला बळी न पडता त्यांनी ६ जानेवारी रोजी या विरोधात ठाणे येथील अन्न व औषध प्रशासन कार्यालयात रीतसर तक्रार अर्ज दाखल केला. त्या वेळी तेथील कर्मचाऱ्याने ती पिशवी कार्यालयात जमा करून त्याची तेथील प्रयोगशाळेत तपासणी करण्यात येईल, असे वालिया यांना सांगितले. त्यावर वालिया यांनी अविश्वास दाखवून त्या पिशवीचा रीतसर पंचनामा करून ती न्यायवैद्यक प्रयोगशाळेतच तपासणीसाठी पाठविण्याची मागणी केली. ती अमान्य करण्यात आल्याने वालिया यांनी ८ जानेवारी रोजी मीरा रोड पोलिसांत तक्रार अर्ज दाखल केला आहे. परंतु, अद्याप या प्रकरणावर गांभीर्य दाखविण्यात आले नसून नागरिकांच्या आरोग्याला अपायकारक ठरणाऱ्या कंपन्यांकडे शासकीय यंत्रणा हितसंबंधामुळे कारवाई करीत नसल्याचा आरोप त्यांनी केला आहे. सध्या ती पिशवी त्यांनी फ्रीजरमध्ये ठेवली आहे. (प्रतिनिधी)
अमुल दुधात आढळले झुरळ
By admin | Updated: January 10, 2015 22:34 IST