आंधळगावमध्ये तरुणाचा खून; तीक्ष्ण हत्याराचा वापर

फोटो -
26परमेश्वर शिंदे
मंगळवेढा: घराबाहेर अंगणात झोपलेल्या 35 वर्षीय तरुणाचा डोक्यात तीक्ष्ण हत्याराने मारुन खून केल्याची घटना बुधवारी पहाटे अडीचच्या सुमारास आंधळगाव (ता.मंगळवेढा) येथे घडली़ परमेश्वर रावसाहेब शिंदे असे मृत तरुणाचे नाव आहे.
आंधळगाव येथे रावसाहेब शिंदे हे आपल्या कुटुंबीयांसह राहत आहेत. त्यांना तीन मुले व एक मुलगी असून, त्यातील एक मुलगा वस्तीवर कुटुंबासह राहतो. बाकी सर्वजण गावात राहतात. मंगळवारी संध्याकाळी मयताचा भाऊ, आई, बहीण हे जेवण करुन झोपी गेले. त्यावेळी परमेश्वर हा उशिरा टी.व्ही़ बघून घरासमोरील पटांगणात झोपला होता. मध्यरात्रीनंतर अज्ञात मारेकर्‍यांनी तीक्ष्ण हत्याराने परमेश्वर याच्या कानफटीच्या वर जोराने मारल्याने परमेश्वर जागीच मृत झाला. याबाबत मृताची आई पारुबाई शिंदे यांनी मंगळवेढा पोलीस ठाण्यात फिर्याद दिली असून पूर्ववैमनस्यातून नवनाथ उत्तम शिंदे या संशयिताने परमेश्वर याचा खून केल्याचे फिर्यादीत म्हटले आहे. दरम्यान या घटनेनंतर पोलीस निरीक्षक सालार चाऊस यांनी घटनास्थळी तत्काळ भेट देऊन परिस्थितीची पाहणी केली व सोलापूरहून श्वानपथक मागविले होते. परंतु श्वान घराच्या पाठीमागून फिरत सांगोला-मंगळवेढा महामार्गावर येऊन थांबले.
उपविभागीय पोलीस अधिकारी किशोर कारंडे यांनी घटनास्थळी भेट दिली. शवविच्छेदनानंतर आंधळगाव येथील स्मशानभूमीत परमेश्वरवर अंत्यसंस्कार करण्यात आले.