ऑनलाइन लोकमत
नवी दिल्ली, दि. २८ - दिल्ली सत्तास्थापन केल्यावर आपमधील पक्षांतर्गत संघर्ष पुन्हा एकदा चव्हाट्यावर येण्याची चिन्हे आहेत. आपच्या राजकीय धोरण विषयक समितीची पुनर्बांधणी केली जाणार असून या समितीमधून आपचे संस्थापक सदस्य योगेंद्र यादव यांची गच्छंती होणार असल्याची चर्चा आहे.
आम आदमी पक्षाच्या राष्ट्रीय कार्यकारी समितीने पक्षाच्या राजकीय धोरण समितीची पुनर्बांधणी करावी असा प्रस्ताव आपचे प्रमुख अरविंद केजरीवाल यांच्याकडे पाठवला आहे. दिल्लीत सत्तास्थापन केल्यावर आपच्या राष्ट्रीय कार्यकारिणीतील पदाधिका-यांची नुकतीच बैठक पार पडली. या बैठकीत पक्षातील वरिष्ठ नेत्यांनी योगेंद्र यादव यांच्या निर्णयावर नाराजी व्यक्त केली. योगेंद्र यादव यांनी दिल्लीतील उमेदवार निवडीच्या प्रक्रियेवर उघडपणे टीका केली होती. तसेच दिल्लीतील विजयानंतर अन्य राज्यांमध्येही निवडणूक लढवू अशी घोषणा यादव यांनी केली होती. तर दुसरीकडे आपचे प्रमुख अरविंद केजरीवाल यांनी आधी दिल्लीवरच लक्ष केंद्रीत करु असे सांगितले होते. त्यामुळे केजरीवाल व यादव यांनी परस्परविरोधी विधान केल्याचे समोर आले होते. बैठकीत अनेकांनी यादव यांच्या भूमिकेवर जोरदार टीका केली. योगेंद्र यादव आपच्या राजकीय धोरणविषयक समितीचे सदस्य आहेत. ही समिती बरखास्त करुन समितीची पुनर्बांधणी करावी असा प्रस्ताव बैठकीत मंजूर करण्यात आला. आता केजरीवालच या प्रस्तावावर अंतिम निर्णय घेतील.
दरम्यान, अरविंद केजरीवाल यांनीदेखील दिल्लीच्या मुख्यमंत्रीपदावर विराजमान झाल्याने पक्षाच्या संयोजक पदाचा राजीनामा दिला होता. मात्र, बैठकीत हा राजीनामा फेटाळण्यात आला.