अनैतिक संबंधाच्या संशयावरून पत्नीचा निर्घृण खून

जयसिंगपुरातील घटना : पती स्वत:हून पोलिसांत हजर
जयसिंगपूर : अनैतिक संबंधाच्या संशयावरुन डोक्यात लोखंडी सळईने वार करून पत्नीचा निर्घृण खून करून पती स्वत:हून पोलीस ठाण्यात हजर होण्याचा प्रकार आज (सोमवार) शहरात घडला.सुजाता ऊर्फ विजया संतोष सावंत (वय ३२, मूळ रा. कोल्हापूर, सध्या रा. इंदिरानगर झोपडप˜ी, जयसिंगपूर) असे मृत महिलेचे नाव आहे. तर संतोष रामचंद्र सावंत (३५. रा. नाना पाटील नगर, कोल्हापूर) असे तिच्या पतीचे नाव आहे.
याबाबत पोलीसांनी दिलेली माहिती अशी : चौदा वर्षांपूर्वी सुजाता हिचा संतोष सावंत याच्याशी विवाह झाला होता. संतोष हा जेसीबी वाहनावर चालक म्हणून काम करतो. त्यांना ओंकार (१३), प्रणव (१०) अशी दोन मुले आहेत. चालक असल्याने संतोष नेहमी बाहेरगावी असायचा, दरम्यान कुरुंदवाडमधील एका व्यक्तीशी सुजाता हिचे सहा वर्षांपासून प्रेमसंबंध असल्याचा संशय संतोषला होता. त्यावरुन दोघांत वरचेवर वाद होत होता. सहा महिन्यांपूर्वी सुजाता ही प्रियकरासोबत बेपत्ता झाल्याची तक्रार संतोषने कुरुंदवाड पोलिसांत दिली होती. या घटनेनंतर सुजाता व संतोष यांच्यात समेट झाला होता. तीन दिवसांपूर्वी जयसिंगपूर येथील इंदिरानगर झोपडप˜ीमधील सोमनाथ जाधव यांच्या घरी तो भाड्याने राहायला आला होता. दरम्यान, काल (रविवार) रात्री संतोष व सुजाता यांच्यात अनैतिक संबंधावरून वाद झाला. मध्यरात्री साडेबारा वाजण्याच्या सुमारास सुजाता झोपली असताना संतोषाने चिडून लोखंडी सळीने डोक्यात वार करून तिचा खून केला.
आज सकाळी घटनास्थळी पोलीस उपाधीक्षक प्रकाश घारगे, सहायक पोलीस निरीक्षक संतोष डोके, पोलीस उपनिरीक्षक गणेश लोकरे, शाम कदम यांच्यासह पोलीस कर्मचारी दाखल झाले. घटनास्थळाचा पंचनामा केला. याबाबतची फिर्याद सुजाताची आई मीना बळवंत ताबरे (४६, रा. झारी मशिदीच्या मागे, कुरुंदवाड)हिने जयसिंगपूर पोलीस ठाण्यात दिली.
चौकट -
संशयित पोलिसांत हजर
डोक्यात वार केल्यानंतर सुजाता गंभीर जखमी झाली. मोठा रक्तस्राव झाल्याने ती मृत झाली. त्यानंतर पहाटे चार वाजता संतोष घरातून बाहेर पडला. प्रथम कुरुंदवाडला जाण्यासाठी बसस्थानकावर आला होता; मात्र कुरुंदवाडकडे बस नसल्याने त्याने कोल्हापूर गाठले. त्यानंतर सकाळी परत तो कुरुंदवाड पोलिसांत हजर होऊन पत्नीचा खून केल्याची कबुली दिली. कुरुंदवाड पोलिसांनी जयसिंगपूर पोलिसांशी संपर्क साधून घटनेची माहिती दिली. घटनास्थळी संशयिताला आणण्यात आले होते. त्याच्या चेहर्‍यावर कोणताही लवलेश नव्हता.